«Հրապարակ». «Սեւան» ԲԿ-ն եւ «Փորձաքննությունների ազգային բյուրո»-ն՝ հակակոռուպցիոն թիրախում

«Հրապարակ». «Սեւան» ԲԿ-ն եւ «Փորձաքննությունների ազգային բյուրո»-ն՝ հակակոռուպցիոն թիրախում

Fri, 27 Mar 2026 10:15:25 +0400


Թալանվածը հատիկ առ հատիկ հետ բերելու վարչապետի խոստումը դատախազությունում բառացի են հասկացել: Նորանոր վարույթներ են հարուցում եւ ներկայացնում հակակոռուպցիոն դատարան: Օրերս երկու նման գործի մասին լսեցինք: Մեկը «Սեւան» բժշկական կենտրոնի տնօրեն Արամ Նիկողոսյանին է վերաբերում, մյուսը՝ ՀՀ գիտությունների ազգային ակադեմիայի «Փորձաքննությունների ազգային բյուրո» ՊՈԱԿ-ի տնօրեն Արգամ Հովսեփյանին, որի լիազորությունները քրեական վարույթով կասեցված են:

«Սեւան» ԲԿ տնօրենին մեղսա­գրվում է 2022-2024 թվականներին վերաբերող «խոշոր չափերի գույքի հափշտակություն եւ խմբի կազմում փաստաթղթերի կեղծում»: Երբ կարդում ես մեղադրանքը, թվում է, թե ԲԿ-ում թալանչիների բանդա է գործել: Իրականում, խոսքը ծառայողական հանցանքի մասին է: Ըստ դատախազության, տնօրենը 2 տարի աշխատավարձ է տվել իր մտերիմ անձին, որը հաճախ բացակայել է աշխատանքից, չի գնացել աշխատանքի այնքան, որքան պետք է գնար: 2 տարում նա ստացել է մոտ 2,2 մլն դրամ, հենց այսքան էլ հաշվարկվել է պետությանը հասցված վնասը, որն ամբողջությամբ փոխհատուցվել է: Աշխատանքի չգնացած այդ մտերիմ անձը, մեր տեղեկություններով, հիվանդանոցի աշխատակից Արաբելլա Հովհաննիսյանն է:

Թե ինչպես հանկարծ «Սեւան» ԲԿ տնօրեն Արամ Նիկողոսյանն անցավ անցանկալիների շարքը, դժվար է ասել: Հիշեցնենք, որ Արամ Նիկողոսյանին 2021 թվականին այդ պաշտոնին էր նշանակել Գեղարքունիքի մարզպետ Կարեն Սարգսյանը։ Այն ժամանակ մարզային ԶԼՄ-ներով նոր տնօրենի գովքն էին անում, նշում, թե նոր ղեկավարը նորարարական մոտեցումներով է առաջնորդվում, նվազեցրել է ԲԿ-ի պարտքերը, վերացրել է փաստաթղթերի կեղծման արատավոր ավանդույթը, բարձրացրել է բժշկական ծառայությունների որակը, կերպարանափոխել «պայթած» հիվանդանոցը, նոր բաժանմունքներ բացել: Արամ Նիկողոսյանին պարգեւատրում էին, շնորհակալագրեր տալիս, ենթակաները տարածում էին իրենց նոր տնօրենի լուսանկարները՝ շնորհակալագրերը ձեռքին: Ընդամենը 2,2 մլն դրամի վերականգնված վնասի համար, առանց դատ ու դատաստանի, բազմաթիվ պատվոգրեր ստացած Նիկողոսյանի համբավը հավասարեցրին զրոյի:

Հակակոռուպցիոնի մյուս թիրախը Գիտությունների ազգային ակադեմիայի «Փորձաքննությունների ազգային բյուրո» ՊՈԱԿ-ի տնօրեն Արգամ Հովսեփյանն է, որն այս հիմնարկի հնագույն աշխատակիցներից է: Ասում են՝ բյուրոյի դատաբժշկական փորձաքննությունների բաժնում աշխատել է հիմնարկի ստեղծման օրվանից, բաժնի պետ է եղել: Արգամ Հովսեփյանի լիազորությունները եւս քրեական վարույթով կասեցված են: Գլխավոր դատախազությունը դատարանից պահանջում է՝ Արգամ Հովսեփյանից եւ նրա հարազատներից, հօգուտ Հայաստանի Հանրապետության, բռնագանձել 5 բնակարան, մոտ 163 մլն դրամ, «որը չի հիմնավորվում անձի օրինական եկամուտներով, ունի ապօրինի ծագում, փոխանցվել է բարեխիղճ ձեռքբերողի կամ հնարավոր չէ նույնականացնել եւ բռնագանձել», եւ մոտ 135 մլն դրամ էլ՝ «որպես ապօրինի եկամտի մնացորդ»: Մեկ ավտոմեքենան էլ չեն մոռացել:

Արգամ Հովսեփյանը «նախկինի» համբավ ունի, ամուսնացած է Շմայսի՝ ԱԺ նախկին պատգամավոր Առաքել Մովսիսյանի բարեկամուհու հետ, ուստի կարծիք կա, որ նրա դեմ կոռուպցիոն քննությունը պատահական չէ: Վերջին անգամ նա բյուրոյի տնօրենի պաշտոնում վերընտրվել է 2024 թվականին, բայց մինչ այդ էլ պարբերաբար խոսում էին նրա մոտալուտ պաշտոնանկության մասին: 2023-ի օգոստոսին դատախազությունը փորձաքննությունների բյուրոյի նկատմամբ հետաքրքրություն էր ցուցաբերել աշխատակիցներից մեկի բողոքի հիման վրա: Այդ «մարտում» Արգամ Հովսեփյանը հաղթել էր: Ասում են, որ գլխավոր դատախազը գոհ չէ բյուրոյի փորձաքննություններից, դրանց հիման վրա չեն կարողանում դատապարտել նրանց, որոնց պետք է դատել, եւ Հովսեփյանին վաղուց էին, ինչպես ասում են, գրչի ծայրի վրա պահում: Բյուրոյում պատմում են, որ տնօրենի այսքան հարատեւության միակ պատճառն այն է, որ Աննա Վարդապետյանը նրան փոխարինող թեկնածու չուներ ու ստիպված էր հաշտվել նրա գոյության հետ: Այդ ընթացքում խոշորացույցի տակ ուսումնասիրել են Հովսեփյանի եւ նրա հարազատների ունեցվածքը եւ նրանց պատկանող բնակարանների բռնագանձման վարույթ են նախաձեռնել, որի հիմքով էլ պաշտոնավարումը կասեցրել են:

Փորձաքննությունների բյուրոյի որոշ աշխատողներ այս օրերին հիշում են բումերանգի օրենքը, եւ որ ինքն էլ՝ Արգամ Հովսեփյանը, պաշտոնը ստանալուց հետո մոռացավ իր նախկին շեֆին՝ «Փորձաքննությունների ազգային բյուրո» ՊՈԱԿ-ի հիմնադիր եւ առաջին ղեկավար Արտաշես Ջավադյանին, որը նաեւ միջազգային ասպարեզում լայն կապեր ուներ: Տնօրեն դառնալուց հետո Հովսեփյանը չէր հրավիրում Ջավադյանին իր ստեղծած կառույցում կազմակերպվող միջոցառումներին, աշխատանքից հեռացնում էր նրա մարդկանց: «Ինչպես որ նա գեղեցիկ չվարվեց Ջավադյանի հետ, այդպես էլ իր հետ գեղեցիկ չվարվեցին, եւ այժմ բումերանգը գնում է նրա կողմը»,- ասաց բյուրոյի նախկին աշխատակիցներից մեկը:

© 2026 Secure News Portal

Source: Hraparak

Hraparak.am

Recent Posts

Նոր գերհզոր հրթիռ են արտադրել

Նոր գերհզոր հրթիռ են արտադրել Sat, 21 Nov 2026 00:00:30 +0400 Իրանը ներկայացրել է նոր…

9 րոպե ago

ԵՊՀ դասախոսը կրկին հաղթեց

ԵՊՀ դասախոսը կրկին հաղթեց Fri, 20 Nov 2026 23:48:05 +0400 Վերաքննիչ դատարանի (նախագահող դատավոր Ի.…

21 րոպե ago

Ռիհաննան իր մեկ տարեկան դստերը բերել է պոդիում

Ռիհաննան իր մեկ տարեկան դստերը բերել է պոդիում Fri, 20 Nov 2026 23:45:48 +0400 Ռիհաննան…

24 րոպե ago

Բրիտանիան ու Նորվեգիան Ուկրաինային կտրամադրեն 2 արագընթաց ռազմական նավ

Բրիտանիան ու Նորվեգիան Ուկրաինային կտրամադրեն 2 արագընթաց ռազմական նավ Fri, 20 Nov 2026 23:30:14 +0400…

39 րոպե ago

«Արցախցիների անձնագրերում որպես ծննդավայր «Ադրբեջան» նշելը ՀՀ իշխանությունների քաղաքական որոշման արդյունք է». Նարե Սիմոնյան

«Արցախցիների անձնագրերում որպես ծննդավայր «Ադրբեջան» նշելը ՀՀ իշխանությունների քաղաքական որոշման արդյունք է». Նարե Սիմոնյան Fri,…

43 րոպե ago

Ջենիֆեր Լոպեսը բացահայտել է իր կատարյալ մարմնի գաղտնիքը 57 տարեկանում

Ջենիֆեր Լոպեսը բացահայտել է իր կատարյալ մարմնի գաղտնիքը 57 տարեկանում Fri, 20 Nov 2026 23:08:01…

1 ժամ ago