Իրանն ու ԱՄՆ բանակցում են․ Բեռլինը նշել է հանդիպման վայրը
Fri, 27 Mar 2026 14:00:43 +0400
Գերմանիայի արտաքին գործերի նախարար Յոհան Վադեֆուլը հայտարարել է, որ ԱՄՆ-ն և Իրանը անուղղակի բանակցություններ են վարել, և որ երկու կողմերի ներկայացուցիչները շուտով պլանավորում են հանդիպել Պակիստանում, հաղորդում է The Guardian-ը։
«Իմ տեղեկությունների համաձայն՝ եղել են անուղղակի շփումներ, և նախապատրաստություններ են իրականացվել ուղիղ հանդիպման համար։ Սա, ակնհայտորեն, շատ շուտով տեղի կունենա Պակիստանում», – ասել է Վադեֆուլը։
Հիշեցնենք, որ իրանցի զինվորական պաշտոնյաները հայտարարել են, որ ԱՄՆ-ն, ըստ էության, «բանակցություններ է վարում ինքն իր հետ», քանի որ Սպիտակ տունը ակտիվորեն խոսում է Թեհրանի հետ պատերազմը դադարեցնելու համար շփումների մասին։
Իրանի զինված ուժերի խոսնակ Իբրահիմ Զոլֆակարին պետական հեռուստատեսությամբ ունեցած ելույթում քննադատել է ԱՄՆ ղեկավարությանը և հայտարարել, որ «նրանց խոստումների ժամանակն արդեն սպառվել է»։
Ավելին, Իրանը հայտարարել է, որ մերժում է պատերազմը դադարեցնելու ԱՄՆ 15 կետանոց ծրագիրը և շարունակում է հարձակումները Իսրայելի և արաբական երկրների վրա։