Իրանում ռեժիմն արդեն փոխվել է․ Պենտագոնի ղեկավարի հնչեղ հայտարարությունները
Wed, 01 Apr 2026 04:00:28 +0400
Իրանի հետ բանակցությունները շարունակվում են և շարունակում են ակտիվ մնալ, հայտարարել է ԱՄՆ պաշտպանության նախարար Փիթ Հեգսեթը։
«Բանակցությունները շատ իրական են, դրանք շարունակվում են, դրանք ակտիվ են և թափ են հավաքում», – ասել է նա։
Հեգսեթի խոսքով՝ առաջիկա օրերը կարող են վճռորոշ լինել իրավիճակի զարգացման համար։ Նա ընդգծել է, որ Իրանն ունի սահմանափակ ռազմական հնարավորություններ, չնայած այն կշարունակի հրթիռներ արձակել․ «Այո, նրանք դեռ որոշ հրթիռներ կարձակեն, բայց մենք դրանք կխփենք»։
Նա նաև կոչ է արել Թեհրանին համաձայնության գալ՝ ընդգծելով, որ նախագահ Դոնալդ Թրամփը «բլեֆ չի անում» և մտադիր չէ նահանջել։
«Եթե Իրանը իմաստուն լինի, ապա կկնքի գործարք», – նշել է Հեգսեթը։
Նախարարը հայտարարել է, որ Իրանում իշխանության փոփոխություն է տեղի ունեցել, և նա կարծում է, որ նոր ղեկավարությունը պետք է հաշվի առնի ստեղծված իրավիճակը․ «Ռեժիմի փոփոխություն է տեղի ունեցել։ Այս նոր ռեժիմը պետք է ավելի իմաստուն լինի, քան նախորդը»։
Նրա խոսքով՝ հնարավոր համաձայնագրի պայմաններն արդեն իսկ հաղորդվել են իրանական կողմին, և որոշումը վերապահված է Թեհրանին։ Հեգսեթը նաև նշել է, որ եթե բանակցությունները ձախողվեն, Պենտագոնը կշարունակի ռազմական գործողությունները՝ ավելի մեծ ինտենսիվությամբ։
Նա նշել է, որ ԱՄՆ հարվածները ազդում են իրանական ուժերի մարտական պատրաստվածության վրա․ «Մեր հարվածները խաթարում են իրանական բանակի մարտական ոգին՝ հանգեցնելով զանգվածային դասալքության և հիմնական անձնակազմի պակասի»։ Պենտագոնի ղեկավարը հավելել է, որ Մերձավոր Արևելքում գտնվող ԱՄՆ զինվորական անձնակազմը կողմ է գործողությունների մասշտաբի ընդլայնմանը։
«Մեր զինվորականները ցանկանում են ավելի շատ ռումբեր, ավելի շատ թիրախներ՝ առաքելությունն ավարտելու համար», – հայտարարել է նա։
Հեգսեթը նաև մեղադրել է Չինաստանին և Ռուսաստանին Իրանի հետ հետախուզական տվյալներ կիսվելու մեջ՝ նշելով, որ ԱՄՆ-ն հետևում է նման գործողություններին։