Իսկը երկու տիրոջ ծառա
Wed, 01 Apr 2026 18:45:39 +0400
Չեք պատկերացնի, թե որքան հեռատես անձնավորություն է ՀՀ վարչապետի պաշտոնը զբաղեցնող անձը: Եվրամիության չինովնիկների հետ բարեկամական հարաբերություններ հաստատելով՝ տասնյակ միլիոնավոր եվրոներ է ստանում տարբեր ծրագրերի առումով:
Հատկապես ԱԺ ընտրության նախաշեմին, որպեսզի դրանով գնի փողի մեռած հայաստանցիների բարեհաճությունը: Չէ, դրանք այդ գումարից ոչինչ չեն ստանալու: Բայց միայն այն հանգամանքը, որ վերը նշված անձի շնորհիվ գումար է եկել երկիր, բավարար է, որպեսզի նրանց սրտերը հովանան: Նույնիսկ չեն էլ մտածում, որ ստացված գումարի չափով կամ նույնիսկ ավելի շատ ծախսվում է վարչապետամերձ շրջապատին պարգևատրումների տեսքով կաշառելու համար:
Բայց դա դեռ ամբողջը չէ: ԱԺ ընտրության նախաշեմին գումար է ստացվում նաև հենց ընտրական գործընթացների կապակցությամբ: Որպեսզի, օրինակ, չեզոքացվեն Հայաստանի նկատմամբ իրականացվող և իրականացվելիք հիբրիդային հարձակումները կիբերանվտանգության առումով: Եվ որպեսզի եվրոպական հարկատուները՝ երևի ոչ այնքան հերոս, հետագայում ԵՄ չինովնիկներից հաշվետվություն չպահանջեն, թե ինչու է նման ծրագրային գումար ուղղվել Հայաստան, գործի է դրվում եվրոպացիների կողմից ՀՀ-ում ձևավորված արտաքին հետախուզության ծառայությունը: Ծառայության պետ Քրիստիննե (նենց էլ չիմացանք, թե ինչու է անվան վերջում դրվում երկու «ն») Գրիգորյանն էլ միջանկյալ ուսումնասիրություն է հրապարակում ինչ-որ պետությունից արտաքին ինչ-որ վտանգի վերաբերյալ:
Տեսնում եք, չէ՞, թե որքան հեռատես անձնավորություն է ՀՀ վարչապետի պաշտոնը զբաղեցնող անձը: Բոլորս էլ հասկանում ենք, որ վտանգի աղբյուրը գտնվում է հյուսիսում, սակայն երկրի անվանումը տրված չէ: Ու այսօր էլ վերը նշված անձը բարեկամական այցով գտնվում է հենց այդ երկրում: Այցը գնահատում եմ բարեկամական, քանի որ վերջին հայտարարել է, թե Ռուսաստանը մեր բարեկամն է: Իսկ եթե այդպես է, ապա այցն էլ, բնականաբար, չի կարող չլինել բարեկամական: Դե հիմա պատկերացրեք. եթե տիկին Գրիգորյանը որպես սպառնալիքի աղբյուր նշեր Ռուսաստանի անունը, ապա ինչպե՞ս կարող էր այդ երկիրը լինել մեր բարեկամը: Բա որ ասում եմ՝ վերը նշված անձը հեռատես է, չեք հավատում: Ուրիշ հարց, որ Ռուսաստանի մայրաքաղաքի կենտրոնում՝ Կրեմլում, խոտակեր չկա: Եվ նրանք պարզ հասկանում են, որ սպառնալիքն էլ է գալիս իրենցից, բարեկամն էլ են իրենք: Բայց քանի որ իրենք 2022-ի հոկտեմբերից այս կողմ՝ երբ Պրահայում վերը նշված անձը հայտարարեց Արցախի՝ ադրբեջանական լինելու մասին, իրենք ստիպված են եղել իրենց դնել երկարականջ կենդանու տեղ, ապա ՀՀ գործող իշխանությունում էլ նրանց նկատմամբ կարող է գոյություն ունենալ իրար բացառող երկու վերաբերմունք:
Դա, իհարկե, չի նշանակում, թե արդարացնում եմ ՀՀ վարչապետի պաշտոնը զբաղեցնող անձի վարած քաղաքականությունը: Բայց եթե հաշվի ենք առնում, որ վերջինս ադեկվատ չէ՝ դրա օրինակները բազմաթիվ են մեր կյանքում, ապա նրա վարած արտաքին քաղաքականությունն էլ պետք է լիներ հենց այդպիսին: Առնվազն Ռուսաստանի հարցում, քանի որ 2021 հունիսյան արտահերթ ընտրությունների շեմին խայտառակ պարտության խորհրդանիշ անձը ՌԴ նախագահի կողմից չէր դիտարկվում որպես Հայաստանը դավաճանած մեկը: Ու այսօր իրենք վայելում են հինգ տարի առաջվա վարքագծի հետևանքները: Իսկ Փաշինյա՞նը՝ կհարցնի ընթերցողը: Փաշինյանն ի՞նչ. Եվրամիությունից նա փող և ինչ-որ խմբի տեսքով տեխնիկական աջակցություն կստանա ընդդեմ Ռուսաստանի: Ինչպես նաև սեփական իշխանության վերարտադրության համար: Իսկ Ռուսաստանին էլ կանվանի բարեկամ՝ օգտվելով ԵԱՏՄ-ում մնալու առավելություններից: Եվ այդ թվում՝ դեպի այդ երկիրն ապրանքների վերարտահանման շնորհիվ առաջացած եկամուտներից: Իսկը երկու տիրոջ ծառա մը…
ՀԳ. 18-րդ դարի իտալացի թատերագիր Կառլո Գոլդոնիի «Երկու տիրոջ ծառա» կատակերգության մոտիվներով: