Երեւանի քաղաքապետարանի, դրա ենթակայությամբ գործող վարչական շրջանների հետ կապված՝ բազմաթիվ վարույթներ են հարուցվել վերջին տարիներին: Բայց հանրությունը դրանց մասին իմանում է հարուցման պահին, երբ մարդիկ են ձերբակալվում, կալանավորվում, պաշտոնյաներ են ազատվում, իսկ թե հետո ինչ է լինում, հաճախ անհայտ է մնում: Մենք տեղեկացանք, որ ամիսներ առաջ մի սկանդալային ձերբակալություն էլ է տեղի ունեցել Երեւանի քաղաքապետարանում։ Ձերբակալվել է քաղաքապետարանի «Գերատեսչական շենքերի պահպանման եւ շահագործման» ՓԲ ընկերության տնօրենի տեղակալ Արմեն Մարտոյանը, նրա հետ մեղադրյալի աթոռին են հայտնվել կինը՝ Անին, եւ քրոջ փեսան։

Մարտոյանը, ըստ մեղադրանքի, շորթել է մոտ 84 միլիոն դրամ, կինը մոտ 30 միլիոն դրամ «փողերի լվացում է» արել՝ «ամուսնու հանցավոր ճանապարհով ստացած գույքն ապօրինի կերպով շրջանառության մեջ դնելով»: Փեսային էլ նույն մեղադրանքն է առաջադրվել՝ «մոտ 29 միլիոն դրամի գույքի օրինականացում, որը ձեռք է բերվել հանցավոր ճանապարհով»։ Խոշոր չափերի գումարներ շորթելու, այլ ծանր հանցանքների մեջ մեղադրվող անձինք, սակայն, պարզվում է, ազատության մեջ են․ հիմնական դերակատարի՝ Մարտոյանի նկատմամբ խափանման միջոց է ընտրվել վարչական հսկողությունը, մյուս երկուսի նկատմամբ՝ բացակայելու արգելքը։

Արմեն Մարտոյանի փաստաբան Արմեն Թեւանյանը «Հրապարակ»-ին ասաց, որ մեղադրանքը շորթման մասին չէ, այլ՝ փողերի լվացման։ Ապա նշեց՝ այս քրեական վարույթն իրավաբանության հետ կապ չունի, իր պաշտպանյալը շինարարությամբ է զբաղվել, որի արդյունքում էլ 80 միլիոն դրամ գումար եկամուտ է ստացել, իսկ իրավապահները դա վերագրել են փողերի լվացմանը։ Թեւանյանը չցանկացավ այլ մանրամասներ ներկայացնել՝ նշելով, թե դատական նիստի է շտապում։ Վերջում ավելացրեց, որ իր պաշտպանյալի նկատմամբ որպես խափանման միջոց կիրառված է եղել տնային կալանքը, ապա փոխվել է վարչական հսկողությամբ, գրավով, ինչը եւս խոսում է ոչ այս մեղադրանքի օգտին։