«Հրապարակ»․ Որն է «ապահարզանի» պատճառը

Sat, 11 Apr 2026 08:15:06 +0400

Արման Թաթոյանի առաջնորդած «Միասնության թեւերը» եւ Ավետիք Չալաբյանի «ՀայաՔվե»-ն երեկ հայտարարեցին համագործակցությունը դադարեցնելու մասին, ինչի վերաբերյալ մենք շաբաթներ առաջ էինք գրել, որ անլուծելի տարաձայնությունների պատճառով շուտով համագործակցությունը կխզվի, եւ, մեծ հավանականությամբ, այս միավորները համատեղ ճակատով չեն մասնակցի հունիսի 7-ի ընտրություններին։

Համատեղ հայտարարությամբ կողմերը թեպետ, հստակ, չեն պարզաբանել ապահարզանի պատճառների մասին, սակայն, մեր աղբյուրների փոխանցմամբ, Չալաբյանն ու Թաթոյանը լեզու չեն գտել նախընտրական ցուցակի ձեւավորման հարցի շուրջ։

Մեզ պատմեցին, որ Չալաբյանը մեծ ամբիցիաներ է ունեցել եւ հավակնել է, որ ամեն զույգ համարն իր թիմից պետք է լինի, ասենք՝ Թաթոյանն առաջին համար, ինքը՝ երկրորդ, հաջորդը՝ չորրորդ, վեցերորդ, եւ այսպես շարունակ։ Այսինքն, ցուցակը պետք է ձեւավորվեր 50/50 հարաբերակցությամբ, սակայն իր ամբիցիաներով չի զիջել նաեւ Թաթոյանը՝ համարելով, որ ինքն է լինելու քաղաքական ուժի լոկոմոտիվը եւ ինքը պետք է որոշի, թե ինչ համամասնությամբ կազմվի ցուցակը։ Բացի այդ,Թաթոյանի թիմից հայտարարություն է հնչել Արցախի վերաբերյալ,ինչը վրդովվեցրել է Չալաբյանին եւ խորացրել տարաձայնությունները:

Փետրվարի 27-ին հուշագիր ստորագրած ուժերի երեկվա համատեղ հայտարարության մեջ, ի դեպ, համագործակցությունը խզելու պատճառների մասին հետեւյալն է գրված․ «Անցած ժամանակաշրջանում երկու կազմակերպությունների ղեկավար մարմինների եւ անդամների կողմից կատարվել է մեծ ծավալի աշխատանք՝ միասնական քաղաքական ծրագիր մշակելու եւ նոր քաղաքական բեւեռ ձեւավորելու նպատակով։ Միեւնույն ժամանակ, մի շարք առանցքային ծրագրային հարցերում մեզ դեռեւս չի հաջողվել միասնական դիրքորոշում ձեւավորել, ուստի մենք որոշում ենք կայացրել` ներկա փուլում այս ձեւաչափով ավարտելու համատեղ աշխատանքը»