Իրանը դեռ լիովին չի բացել Հորմուզի նեղուցը․ ո՞րն է պատճառը
Sat, 11 Apr 2026 11:30:40 +0400
Իրանը դեռևս լիովին չի բացել Հորմուզի նեղուցը, քանի որ չի կարողանում գտնել և մաքրել ջրերում տեղադրված բոլոր ականները, հաղորդում է The New York Times-ը՝ հղում անելով ԱՄՆ պաշտոնյաներին։
Նրանց խոսքով՝ իրավիճակը կարող է բարդացնել ԱՄՆ-ի և Իրանի պատվիրակությունների միջև այսօր Պակիստանում մեկնարկելիք բանակցությունները։ Անցյալ ամիս Թեհրանը ականապատել է ռազմավարական նեղուցը՝ օգտագործելով փոքր նավակներ, այն բանից հետո, երբ ԱՄՆ-ն և Իսրայելը պատերազմ սկսեցին Իրանի դեմ։ Ականների սպառնալիքը, ինչպես նաև անօդաչու թռչող սարքերի և հրթիռային հարվածների վտանգը, գործնականում կանգնեցրել են տանկերների և այլ նավերի շարժը, ինչը հանգեցրել է էներգակիրների գների բարձրացմանը։
Այնուամենայնիվ, անցումը բաց է մնացել այն նավերի համար, որոնք պատրաստ են վճարել սահմանված գինը։ Իսլամական հեղափոխության պահապանների կորպուսը նախազգուշացումներ է տվել և հրապարակել անվտանգ երթուղիներ։ Սակայն, ինչպես նշում են ԱՄՆ պաշտոնյաները, քաոսային ականապատումը կարող էր հանգեցնել որոշ ականների, այդ թվում՝ լողացող ականների նկատմամբ վերահսկողության կորստի։
NYT-ը ընդգծում է, որ ականազերծումը զգալիորեն ավելի դժվար է, քան ականապատումը։ ԱՄՆ-ն սահմանափակ հնարավորություններ ունի, իսկ Իրանը չի կարողանում արագ մաքրել նեղուցը սեփական ականներից։