Խնածախի դպրոցի տնօրեն Արտավազդ Աբրահամյանը դիմել է վարչական դատարան՝ իրեն տնօրենի պաշտոնից ազատելու մասին վարչական ակտն անվավեր ճանաչելու, պաշտոնում վերականգնելու եւ վնասների փոխհատուցման պահանջով: Վարչական դատարանը հայցադիմումը վերահասցեագրել է Սյունիքի մարզի ընդհանուր իրավասության առաջին ատյանի դատարան, որը 2 անգամ հայցադիմումը հետ է վերադարձրել:

Հետաքրքրվեցինք, թե ինչն է եղել Աբրահամյանին աշխատանքից ազատելու պատճառը: Պարզվում է` Խնածախի միջնակարգ դպրոցը ձմռանը ջեռուցվել է փայտի վառարաններով, նախկին տնօրենն առաջարկել է դպրոցը գազիֆիկացնել, քանի որ դպրոցի կողքով է անցնում գազատարը: Խնդիրը բարձրաձայնելուց հետո սկսվել են պրոբլեմները. «Գազի հարցը բարձրացնելու համար ինձ կանչել են մարզպետարան, կոնկրետ փոխմարզպետ Հայկ Հարությունյանը նկատողություն է արել, թե` ինչի՞ ես նման խնդիր բարձրաձայնում, այդ խնդիրները ժամանակի ընթացքում կլուծվեն, եւ այդտեղից էլ սկսվեց իմ հանդեպ իրենց ոչ բարյացակամ վերաբերմունքը: Հետագայում իրենք կարողացան դպրոցի կոլեկտիվում ստորագրահավաք կազմակերպել, իբր ես բուլինգի եմ ենթարկում աշակերտներից մեկին, ուսուցիչների հետ վատ եմ խոսում, վիրավորում եմ: Ընդ որում, այդ ստորագրահավաքը կազմակերպել էր կոլեկտիվի մի մասը, մյուս մասը չի մասնակցել: Այդ ստորագրահավաքին մասնակցել են ծնողներ, որոնց հարցրել եմ՝ ի՞նչ խնդիր եք բարձրաձայնել, որ այդ խնդիրը չեմ լուծել, որ բողոք եք հասցրել մարզպետարան: Դիմում-բողոքի տակ ստորագրողների մեծամասնությունը եղել են տղամարդիկ, ինչը խիստ կասկածելի է, որ նրանք կարող էին սթափ վիճակում նման թուղթ ստորագրել: Ընդամենը 2 կին ծնող էր բողոքել, մեկը ներկայիս տնօրենի պաշտոնակատարի հարեւանուհին է, մյուս ծնողը բռնկուն բնավորություն ունի, բոլոր տնօրեններից, այդ թվում ինձնից աշխատանք է ուզել, սակայն ո՛չ ես, ո՛չ էլ ինձնից առաջ եղած տնօրեններն իրեն աշխատանքի չեն ընդունել, քանի որ որեւէ մասնագիտություն չուներ, մենք էլ թափուր հաստիք չունեինք՝ իրեն համապատասխան: Երեք անգամ կազմակերպել, բողոք են գրել, որի արդյունքում ինձ ազատել են աշխատանքից»:

Կարծում եք՝ արդեն ունեի՞ն տնօրենի թեկնածու, դրա համար էլ աշխատանքից ազատել են Ձեզ։ «Այո, ամեն ինչ արվել է ներկայիս պաշտոնակատարի համար, որը եղել է դպրոցի զինղեկը եւ հենց իր նախաձեռնությամբ է ստորագրահավաք կազմակերպել եւ բողոքող ուսուցիչներին անձամբ իր մեքենայով տարել է Սյունիքի մարզպետարան: Զարմանալին ինձ համար այն է, որ իմ դեմ բողոքող ուսուցչուհիներ կային, որ իմ կողմից անգամ վատ հայացքի չեն արժանացել: Անգամ անանուն նամակ էին ուղարկել մարզպետարան, որ դպրոցի աշակերտներից մեկը դպրոց չի գալիս, ինչ ուզում, անում է, եւ դրա մասին ես տեղյակ եմ: Իրականում, այդ աշակերտն այդքան չի բացակայել, պարապմունքների գնացել է Գորիս, այն էլ՝ դասերից հետո: Իրենք անգամ իմ ֆեյսբուքյան գրառումներն են արտատպել, ներկայացրել մարզպետարանին, իբր այլասերվածության տարածում իմ կողմից, այն դեպքում, երբ որ բժշկական էջերից մեկում, որպես կենսաբան, մի հարցի եմ պատասխանել»,- ասաց նախկին տնօրենը, ապա հավելեց, որ իրեն աշխատանքից ազատելիս գյուղացիները ստորագրահավաք էին կազմակերպել` ի պաշտպանություն իրեն, սակայն մարզպետարանը դա հաշվի չի առել: Աբրահամյանը նաեւ նշեց, որ մարզպետարանը կողմնապահ է գտնվել, ով իր անձի դեմ էր, նրանց լսում էին, իսկ ով փորձում էր ճշմարտությունը ներկայացնել եւ դրական կարծիք հայտնել իր մասին, այդ մարդկանց չէին լսում:

Հիշեցնեք, որ 2026-27 ուստարին Խոզնավարի, Վաղատուրի եւ Խնածախի միջնակարգ դպրոցները միանալու են, իսկ աշակերտները կհաճախեն Խնածախում կառուցվող կրթահամալիր: Այսինքն, այս դպրոցի տնօրենը բոլոր հնարավորություններն ուներ մնալու եւ աշխատելու` նրան էլ այս ձեւով են ազատել, տեղ բացել իրենց հավատարիմ մեկի համար: