ԱՄՆ փոխնախագահ Ջեյ Դի Վենսը հայտարարել է, որ Միացյալ Նահանգները Իրանին առաջարկում է մեծ գործարք, որը կներառի երկկողմ տնտեսական հարաբերությունների կարգավորում։ «Նա (Թրամփը) ցանկանում է մեծ գործարք։ Այն, ինչ նա առաջարկում է Իրանին, շատ պարզ է, բայց, անկեղծ ասած, ոչ մի այլ (ԱՄՆ) նախագահ չի ունեցել դա անելու հնարավորություն։ Նա ասել է. «Եթե դուք (իրանական իշխանությունները) պատրաստ եք գործել ինչպես նորմալ երկիր, ապա մենք պատրաստ ենք ձեզ հետ տնտեսապես վարվել ինչպես նորմալ երկրի», – ասել է Վենսը՝ ելույթ ունենալով Ջորջիայի պետական ​​համալսարանում կայացած ֆորումում։

ԱՄՆ փոխնախագահի խոսքով՝ Վաշինգտոնը ձգտում է «ապահովել Իրանի բարգավաճումը» և ինտեգրել այն համաշխարհային տնտեսության մեջ «մեծ գործարքի» միջոցով, «այնպիսի ձևով, որը տեղի չի ունեցել» տասնամյակներ շարունակ։

Վենսը հավելել է, որ բանակցությունները կշարունակվեն՝ համաձայնության հասնելու համար, որը, նրա խոսքով, օգուտ կբերի բոլոր կողմերին։ «Չնայած Վաշինգտոնի և Թեհրանի միջև տասնամյակներ տևած անվստահությանը, երկու կողմերն էլ, կարծես, պատրաստ են գործարքի», – ասել է Վենսը՝ հավելելով. «Նախագահ Դոնալդ Թրամփը հանձնարարել է ամերիկյան պատվիրակությանը բանակցել բարեխղճորեն»։

Վենսը հայտարարել է նաև, որ բանակցությունները կշարունակվեն՝ նշելով, որ երկու կողմերի միջև առկա տարաձայնությունները չեն կարող լուծվել մեկ գիշերվա ընթացքում։