Ապրիլի 12-ի երեկոյան տեղացած ձյունը Դիլիջան քաղաքի բնակիչների կյանքը լիովին խաթարել էր։ Տեղացած ձյան հետեւանքով կոտրվել էին ծառերի ճյուղեր, շարքից դուրս էին եկել էլեկտրական հոսանքագծեր։ Դիլիջանում տներ կային, որոնք, խմելու ջրից զատ, զրկված էին նաեւ էլեկտրական հոսանքից ու բնական գազից։ Էլեկտրական հոսանքի գծերի վթարների հետեւանքով քաղաքը զրկվել էր պոմպերի միջոցով մղվող խմելու ջրից, որովհետեւ պոմպերն էլ են հոսանքով աշխատում։ Դիլիջանի համայնքապետարանի ինտերնետային կայքն ապրիլի 13-ին հայտարարություն էր տեղադրել․ ««Վեոլիա ջուր» ընկերությունը տեղեկացնում է իր հաճախորդներին եւ սպառողներին, որ «Հայաստանի էլեկտրական ցանցեր» ընկերության կողմից իրականացվող վթարավերացման աշխատանքներով պայմանավորված, ս.թ․ ապրիլի 13-ին, ժամը 10:30-ից մինչեւ ապրիլի 14-ը, ժամը 10:30-ը կդադարեցվի Տավուշի մարզի Դիլիջան քաղաքի ջրամատակարարումը: Ընկերությունը հայցում է սպառողների ներողամտությունը՝ պատճառված անհանգստության եւ կանխավ շնորհակալություն հայտնում ըմբռնման համար»։

Տեղացած ձյան հետեւանքով Դիլիջանի որոշ թաղամասեր ապրիլի 13-ի ցերեկն էլ լույս չունեին եւ միայն այդ օրվա երեկոյան ժամերին են ունեցել, բնական գազն էլ մի քանի թաղամասերում շատ ցածր ճնշման է եղել։ Այնպես որ, միայն Երեւանում չէ, որ տեղացած ձյունը կամ անձրեւը կաթվածահար է անում մայրաքաղաքի կյանքը, մարզերում էլ է նույն վիճակը: