Երևանի ասֆալտի հաստությունը մոտ լիներ ձեր երեսի կաշվի հաստությանը, մարդիկ գոհ կլինեին
Thu, 16 Apr 2026 12:29:34 +0400
Ազգային ժողովում հնչած իշխանական ներկայացուցիչների հայտարարությունները քննադատության նոր ալիք են առաջացրել։ «Հայրենիք» կուսակցության անդամ, փաստաբան Սոս Հակոբյանը կոշտ գնահատականներով է անդրադարձել հատկապես Երևանի ճանապարհների վիճակին վերաբերող մեկնաբանություններին։
Նրա խոսքով՝ անընդունելի է, երբ երկար տարիներ մայրաքաղաքում իշխանություն ունեցած քաղաքական ուժը ճանապարհների վատ վիճակը փորձում է բացատրել այն թեզով, թե իբր տասնամյակներ շարունակ ասֆալտապատման աշխատանքներ չեն իրականացվել։ Հակոբյանը պնդում է, որ տարբեր ժամանակաշրջաններում բոլոր իշխանությունները զբաղվել են ասֆալտապատմամբ՝ թե՛ անհրաժեշտությունից ելնելով, թե՛ այլ շարժառիթներով։
Միաժամանակ նա ընդգծում է, որ թեև Երևանի ճանապարհների որակը միշտ չէ, որ բարձր մակարդակի վրա է եղել, ներկայիս վիճակը, իր գնահատմամբ, առանձնապես վատ է և աննախադեպ՝ թե՛ խնամքի, թե՛ ընդհանուր վիճակի առումով։
Փաստաբանը նաև քննադատում է պատասխանատու պաշտոնյաներին՝ նշելով, որ նման խնդիրների համար նախկին տարիներին հղում անելը չի կարող արդարացում լինել։ Նրա կարծիքով՝ քաղաքային ենթակառուցվածքների ներկայիս վիճակը պահանջում է պատասխանատվություն և արդյունավետ լուծումներ, այլ ոչ թե պատճառաբանություններ։
«Երևանի ասֆալտի հաստությունը մոտ լիներ ձեր երեսի կաշվի հաստությանը, մարդիկ գոհ կլինեին»,- նշել է նա: