ՔԿ-ն ոստիկանների կողմից բռնության ենթարկված կնոջ մահը ուզում է բարդել բժիշկների վրա
Thu, 16 Apr 2026 19:45:12 +0400
Քննչական կոմիտեն մի անհասկանալի պատասխան է հրապարակել hraparak.am-ի այսօրվա «Էլի մի զոհ. ոստիկանների բռնարարքներից հետո կինը մահացել է» հոդվածի կապակցությամբ:
Նյութում պատմել էինք Երեւանի բնակիչ Նինա Խաչատրյանի մահվան մասին, որի կապակցությամբ օրերս վարույթ է նախաձեռնվել: Խաչատրյանի տուն ոստիկաններ էին եկել՝ խուզարկության: Որդուն հայհոյանքով, կոպտորեն, չոբանավարի ուզեցել են տանել, կինը մայրաբար մեջտեղ է ընկել, պաշտպանելով որդուն՝ ոստիկաններից, բայց նրան բռունցքներով բրդբրդել են, նետել գետնին, որից նրա ինքնազգացողությունը կտրուկ վատացել է:
Մի քանի օրից Նինա Խաչատրյանը մահացել է աղիքի նեկրոզից, ինչը, ըստ որդու, ոստիկանների հարվածից ստացած աղիքի օղակման հետեւանք է եղել: Մենք զրուցել էինք ընտանիքի անդամների հետ, ծանոթացել փաստաթղթերին։
Մեր հրապարակման կապակցությամբ Քննչական կոմիտեն հերքում է տեղադրել՝ իբր ոստիկանները կապ չունեն կատարվածի հետ․ «Ստացված առերևույթ հանցանքի մասին հաղորդմամբ փաստվում է, որ կինը մահացել է բժշկական միջամտությունից հետո, ինչի հիման վրա նախաձեռնվել է քրեական վարույթ՝ Քրեական օրենսգրքի 187-րդ հոդվածի 2-րդ մասով (բուժաշխատողի կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է մարդու մահ) և կատարվում է նախաքննություն»:
Փաստորեն, առանց դատաբժշկական փորձաքննության, առանց անգամ հաղորդում ներկայացնող անձին հարցաքննելու, առանց Նինա Խաչատրյանի հարազատներից մեկին տուժող ճանաչելու, քննիչները «ապրիորի» որոշել են, որ մեղավոր են բժիշկները, իսկ «Հրապարակի» հոդվածը իրականությանը չի համապատասխանում:
Նշենք, որ Նինա Խաչատրյանի որդու՝ Արման Առաքելյանի հավաստմամբ, որը դեպքի ականատեսն է եղել, իրավապահների այցից մեկ օր առաջ իր մայրը «տոպրակներով կանաչի էր հավաքում դաշտից՝ առողջ էր, առույգ եւ ուրախ»: Իսկ նրանց կողմից բռնության ենթարկվելուց անմիջապես հետո գլխացավ եւ փսխումներ է ունեցել, անկողին է ընկել: «Ինչի՞ հիման վրա են նրանք բժշկական սխալի հոդվածով գործը հարուցել, եթե անգամ ինձ չեն հարցաքննել: Սա նշանակում է, որ նրանք ուզում են կոծկել գործը, պատասխանատվությունից ազատել մորս բռնության ենթարկած ոստիկաններին: Ես տեսել եմ, թե նրանք ինչ են արել մորս հետ, ես վկա եմ, բայց ինձ անգամ չեն էլ հարցաքննել, էդ ինչպե՞ս մեկ-երկու օրում, առանց փորձաքննության հոդվածը դրեցին: Ես հավատում եմ բժիշկներին, համոզված եմ, որ մայրս աղիքի օղակում է ստացել եւ որ դա եղել է ոստիկանների կողմից նրան բռունցքներով գազանավարի սեղմելու ու հատակին գցելու հետեւանք», – ասում է Նինա Խաչատրյանի որդին:
Նա պատրաստվում է բողոքարկել քննիչների որոշումը: