Այսօր Մանկավարժական համալսարանում ձերբակալություններ են տեղի ունեցել։ Ձերբակալվել են բուհի պրոռեկտոր Մարիամ Իսպիրյանը, նրա որդին, ինչպես նաև շախմատիստ Սմբատ Լպուտյանը։ Հակակոռուպցիոն կոմիտեից մեզ հայտնել էին, որ ՀՀ նախաձեռնված քրեական վարույթի շրջանակում ծառայողական լիազորությունները չարաշահելու, խարդախության, դրան օժանդակելու և պաշտոնեական կեղծիք կատարելու մեղադրանքներով ձերբակալվել են Հայկական պետական մանկավարժական համալսարանի պրոռեկտորը և մի շարք այլ աշխատակիցներ: Ավելի ուշ տեղեկացանք, որ շախմատի գրոսմայստեր Սմբատ Լպուտյանն էլ է ձերբակալվել: Նրան մեղադրանքը երևի աբսուրդի ժանրից է` մեղադրում են նրանում, որ պրոռեկտորի որդին աշխատանքի չի գնացել, բայց աշխատավարձ է ստացել, իսկ Լպուտյանը նրա փոխարեն աշխատանքի ներկայանալու մատյանում կամ ինչ որ թղթերի մեջ ստորագրել է:

Մանկավարժականի երկարամյա դասախոսներից փորձեցինք մեկնաբանություն ստանալ, թե ինչ կարծիք ունեն այս ձերբակալությունների և առհասարակ իրենց ձերբակալված կոլեգաների մասին։ Ի դեպ, Լպուտյանն արդեն դուրս է եկել Քննչականից: Բանասիրական գիտությունների դոկտոր, պրոֆեսոր, ՀՊՄՀ Հայ հին և միջնադարյան գրականության մեթոդիկայի ամբիոնի վարիչ, գրականագետ Աելիտա Դոլուխանյանը «Հրապարակի» հետ զրույցում վախվորած ձայնով ասաց, որ ինքը իր գիտական աշխատանքներով է զբաղված և չի ցանկանում որևէ խոսք ասել այս ձերբակալության մասին․ «Ես իմ գրքերի մեջ խորացած, ինձ ոչինչ չի հետաքրքրում, լռությունը ոսկի է», – ասաց Դոլուխանյանը։

Մանկավարժականի համաշխարհային պատմության և դասավանդման մեթոդիկայի ամբիոնի վարիչ Խաչատուր Ստեփանյանն էլ, որը առաջներում ընդդիմադիր էր, զգուշավոր ձայնով ասաց, որ էթիկապես սխալ է խոսել կոլեգաների մասին, հարցին, միայն ասաց, որ ձերբակալված կոլեգաների մասին ունի դրական կարծիք։