Զելենսկին կայցելի՞ Հայաստան․ մանրամասներ Ուկրաինայից
Tue, 21 Apr 2026 20:15:24 +0400
«Հրապարակի» տեղեկություններով՝ մայիսի 4-5-ին Հայաստանում կայանալիք Եվրոպական քաղաքական համայնքի գագաթնաժողովին հնարավոր է նաեւ Երեւան ժամանի Ուկրաինայի նախագահ Վլադիմիր Զելենսկին։ Փորձեցինք տեղեկությունը ճշտել Ուկրաինայի մեր աղբյուրներից։
Մեր այն հարցին, Զելենսկու՝ Երևան հնարավոր այցի մասին կա՞ որևէ պաշտոնական հաստատում Ուկրաինայում, Ուկրաինայի նախագահին առընթեր Ռազմավարական հետազոտությունների ազգային ինստիտուտի (ՌՀԱԻ) փոխտնօրեն, արտաքին հետազոտությունների կենտրոնի ղեկավար Մաքսիմ Պալամարչուկն ասաց․ «Ես որևէ տեղեկություն չունեմ այս մասին։ Բոլոր դեպքերում, նախագահ Զելենսկին մասնակցել է Եվրոպական քաղաքական համայնքի նախորդ գագաթնաժողովներին» եւ հավելեց, որ այցի վերաբերյալ հաղորդագրություններ դեռևս չի տեսել։
Ի պատասխան Զելենսկու հայաստանյան այցի վերաբերյալ մեր նույն հարցին ուկրաինացի քաղաքագետ Եվգենի Մագդան նշեց․ «Ոչ։ Պաշտոնապես նման տեղեկություն չկա։ Բայց ենթադրում եմ, որ նա կմասնակցի»։
«Ոչ պաշտոնական հաղորդագրությունների համաձայն, Ուկրաինայի նախագահը պլանավորում է մասնակցել այս միջոցառմանը։ Սակայն, ինչպես հասկանում եք, անվտանգության նկատառումներից ելնելով, դրա մասին դեռևս պաշտոնապես չի հայտարարվում։ Դե, Ռուսաստանը ցանկացած պահի կարող է մեր գլխին վատ խաղ խաղալ (հրթիռային և անօդաչու թռչող սարքերի հարձակումների ինտենսիվացում), որի պատճառով նախագահը ստիպված կլինի հետաձգել իր այցը Երևան»,-ասաց ՌՀԱԻ անվտանգության ուսումնասիրությունների կենտրոնում պետական և հասարակական անվտանգության բաժնի պետ Վլադիմիր Պոլիվոդան։