Մամեդյարովի հայտարարությունը միջամտություն է ՀՀ ներքին գործերին
Tue, 21 Apr 2026 22:45:30 +0400
Ադրբեջանի նախկին արտգործնախարար Էլմար Մամեդյարովը հայտարարել էր, որ Հայաստանի խորհրդարանական ընտրություններում կհաղթի Նիկոլ Փաշինյանը, այդպիսով իր անմիջական աջակցությունը հայտնելով Փաշինյանին:
Հիշեցնենք, որ Փաշինյանի վիճակն այնքան վատ է, որ նույնիսկ մարզերում համակիրների հետ հանդիպման ժամանակ կատարյալ ֆիասկո են ապրում եւ արդեն թշնամի պետության ներկայացուցիչներն են լծվել իր վերարտադրության խնդրի լուծմանը:
Քաղաքագետ Արա Պողոսյանն ասում է, որ Մամեդյարովի հայտարարությունը, Թուրքիայից հնչող հայտարարությունները պետք է ընկալել ոչ թե էմոցիոնալ տեսանկյունից, այլ քաղաքական գիտությունների տարբեր տեսությունների դիտանկյունից` հասկանալու համար, թե ինչու է նման վարքագիծ դրսևորվում և այդ վարքագիծն ինչ խորքեր ունի:
«Ընդհանրապես հաղթող պետությունները, իրենց մեծ ռազմավարությունը կամ երկարաժամկետ ռազմավարությունը կառուցում են նաև թիրախային պետություններում իրենց համար ցանկալի ռեժիմներ հաստատելով: Վերջին մի քանի տարիներին, մի կողմից Ռուսաստանի Դաշնությունը բազմիցս մեղադրվեց Միացյալ Նահանգներում ընտրական պրոցեսներում միջամտելու մեջ, Չինաստանն է մեղադրվում այս կամ այն պետության ընտրական պրոցեսներում միջամտության մեջ: Այսպիսի իրավիճակներով պայմանավորված այս երկու դերակատարները՝ Ադրբեջանն ու Թուրքիան, հրապարակային խոսույթի միջոցով փորձում են ունենալ էլեկտորալ ազդեցություն, որը այս պարագայում գոնե անուղղակի ազդեցություն է: Եվ պատահական չէ նաև այն, որ իշխանությունների կողմից նոր բաժանարար գիծ է գծվում՝ ընդդիմադիր բոլոր կուսակցություններին «պատերազմի կուսակցություն» անվանելով, իսկ իրենցը՝ միակ խաղաղության կուսակցություն: Այս խոսույթի նպատակն է դառնալ հիբրիդային գործիքի մաս:
Երբ խոսում ենք հիբրիդային պատերազմի մասին, սա ևս հիբրիդային պատերազմի բաղադրիչ է, երբ ուղիղ պատերազմի սպառնալիքը փորձ է արվում օգտագործել որպես էլեկտորալ ազդեցություն քո ցանկալի վարքագիծը պարտադրելու համար հասարակական այս կամ այն խմբին: Եվ բնականաբար, սա նաև միջամտություն է պետության ներքին գործերին»,-ասաց քաղաքագետը:
Ադրբեջանի կողմից ՀՀ Սահմանադրության փոփոխության պահանջը ևս ուղիղ միջամտություն է ՀՀ ներքին գործերին, ընդ որում, այս միջամտությունը անկախ որևէ պետության պարագայում դժվար է պատկերացնել, բայց այս դեպքում մենք գործ ունենք մի իրավիճակի հետ, երբ կա 2020 թվականի պարտությունը, 2023 թվականի էթնիկ զտումները Արցախում, որի պարագայում ադրբեջանական կողմը համարում է, որ ի վերջո, հասել է իր ռազմավարական ազդեցության հաստատմանը:
«Պատահական չի նաև, որ Ալիևը բազմիցս հայտարարել է, որ իր զորքերը Հայաստանի ռազմավարական դիրքերից վերահսկում են ամբողջ պետության տարածքը, ինչը նաև ազդեցության և ազդեցություն կիրառելու, ուժ պրոյեկտելու իր հնարավորությունների մասին է, որը կարող է օգտագործել այս կամ այն իրավիճակում: Սրանով պայմանավորված այդ ներքին պրոցեսներին միջամտությունը աստիճանաբար Ադրբեջանի համար նորմ կդառնա, եթե որևէ դեպքում Հայաստանը գնա զիջումների, թույլ տա և ընդունի արտաքին ազդեցությունը: Առաջին և ամենաակնառու դեպքը կլինի հենց Սահմանադրությունը, որից հետո միջամտությունն արդեն կլինի մեթոդական ուղեկցմամբ»,-եզրափակեց Արա Պողոսյանը: