«Հրապարակ»․ Բաքուն ՌԴ-ի իր լոբբիի միջոցով գործում է ընդդեմ Արա Աբրահամյանի եւ հայերի
Wed, 22 Apr 2026 11:15:00 +0400
Համացանցում եւ մամուլում չեն դադարում լուրերն այն մասին, որ Ռուսաստանի հայերի միության նախագահ Արա Աբրահամյանը շուտով հեռանալու է այդ պաշտոնից, իսկ նրա տեղը զբաղեցնելու է երկրորդ նախագահ Ռոբերտ Քոչարյանի նախկին խոսնակ, գրասենյակի նախկին ղեկավար եւ թիմակից Վիկտոր Սողոմոնյանը։
Արա Աբրահամյանից, ըստ որոշ խոսակցությունների, ե՛ւ ռուսական շրջանակներն են դժգոհ, ե՛ւ Ռուսաստանի հայ համայնքը, քանի որ նրա գործունեության արդյունավետությունը հայկական հարցերի համատեքստում մեծ չէ։ Արա Աբրահամյանի գրասենյակից չեն ցանկանում մեկնաբանել այս խոսակցությունները՝ դրանք համարելով «հիմարություն», եւ հիշեցնում են, որ Արա Աբրահամյանն ընտրվել է որպես Ռուսաստանի հայերի միության նախագահ անցյալ տարվա դեկտեմբերի 7-ին Կրեմլում կայացած համագումարում, բարձրաստիճան հյուրերի աննախադեպ մասնակցությամբ։ Նրան ողջույնի խոսք է ուղարկել անձամբ ՌԴ նախագահ Պուտինը։
«Եվ, հավանաբար, այնքան դժգոհ են, որ Աբրահամյանին նախագահին կից գործող տեղեկատվության եւ միջազգային համագործակցության գծով հանձնաժողովի նախագահ են նշանակել, որին անդամակցում են Զախարովան, Պրիմակովը, Կոնդրաշինը եւ այլք։ Սա՝ զուտ որպես տեղեկություն, ոչ թե մեկնաբանություն»,- «Հրապարակին» ասաց միության փոխնախագահ Լուսիկ Ղուկասյանը։
Նա նաեւ հայտնեց, որ Ռուսաստանի հայերի միությունն այս օրերին պատրաստվում է ապրիլի 24-ի հայերի ցեղասպանությանը նվիրված կոնֆերանսին, միության խորհրդի ընդլայնված նիստին, որի ժամանակ քննարկվելու են Հայ առաքելական եկեղեցուն աջակցելու հարցը, ուրիշ ակտուալ խնդիրներ։ «Իսկ ԶԼՄ-ները թող մեկնաբանություններ փնտրեն այլ տեղերում։ Ի դեպ, Արա Աբրահամյանի անունն օգտագործելով, շատերն են փորձել ճանաչում ստանալ, առայժմ՝ անարդյունք։ Հայտնի փաստ է, որ Բաքուն վաղուց` ՌԴ-ի իր լոբբիի միջոցով գործում է ընդդեմ Արա Աբրահամյանի եւ հեղինակավոր հայ համայնքի, եւ ոմանք նրանց ասեղն են թելում, արդեն զարմանալի չէ, նկատի ունենալով իշխանությունների պրոադրբեջանական տրամադրվածությունը»,- նշեց Ռուսաստանի հայերի միության փոխնախագահը։
Օրերս քաղաքագետ Աղասի Ենոքյանը կարծիք էր հայտնել, թե Կրեմլը պատրաստվում է փոխել Աբրահամյանին, քանի որ «Ռուսաստանում հզոր հայկական համայնքի առկայության հանգամանքում արել էր նվազագույնը, եթե չասենք` ոչինչ, այդ համայնքի գոյությունը ցույց տալու համար․․․ Այդ համայնքի գործունեությունն առաջին հերթին կախված է Կրեմլից, երկրորդ հերթին՝ ռուսաստանցի հայ օլիգարխներից։ Համայնքի ղեկավարի նպատակները երրորդական են»։ Սակայն մեր աղբյուրներն ասում են, որ գոնե մինչեւ հունիսի 7-ի ընտրությունները Աբրահամյանը մնալու է` այս փուլում նման փոփոխության չեն գնա, դե իսկ ընտրությունների արդյունքները կարող են շատ բան փոխել ինչպես Հայաստանում, այնպես էլ մերձավոր սփյուռքի հայ համայնքներում եւ կառույցներում: