Իտալիայի արտաքին գործերի նախարար և փոխվարչապետ Անտոնիո Տայանին կանչել է Հռոմում Ռուսաստանի դեսպան Ալեքսեյ Պարամոնովին՝ Իտալիայի վարչապետ Ջորջա Մելոնիի հասցեին՝ ռուսական հեռուստատեսությամբ ռադիոհեռուստամեկնաբան Վլադիմիր Սոլովյովի կողմից արված վիրավորական հայտարարություններից հետո։

Տայանին այս մասին գրել է իր սոցիալական ցանցերի էջում։ «Ես կանչել եմ Ռուսաստանի դեսպան Պարամոնովին Արտաքին գործերի նախարարություն՝ պաշտոնական բողոք ներկայացնելու հեռուստահաղորդավար Վլադիմիր Սոլովյովի կողմից ռուսական հեռուստատեսությամբ վարչապետ Ջորջա Մելոնիի հասցեին արված չափազանց լուրջ և վիրավորական հայտարարությունների կապակցությամբ, իմ լիակատար համերաշխությունն ու աջակցությունը հայտնելով մեր վարչապետին», – գրել է նա։

Իտալական Ansa լրատվական գործակալության տվյալներով՝ վիճելի վիրավորանքները վերաբերում էին Սոլովյովի վիրավորական արտահայտություններին, որոնցում նա իտալերեն հայհոյանքներով Մելոնիին անվանել էր «ֆաշիստ», «ապուշ» և «բ…»:

Նա մեղադրել է Իտալիայի վարչապետին ԱՄՆ նախագահ Դոնալդ Թրամփին «դավաճանելու» մեջ՝ նշելով, որ «դավաճանությունը Մելոնիի հայրանունն է»։ «Մարդկության համար ամոթ։ Դավաճանությունը նրա հայրանունն է. նա դավաճանել է Թրամփին, որին նախկինում հավատարմության երդում էր տվել», – պնդել է Սոլովյովը։

Ապրիլի 13-ին Իտալիայի վարչապետ Ջորջիա Մելոնին ԱՄՆ նախագահ Դոնալդ Թրամփի՝ Հռոմի պապ Լևոն XIV-ի մասին մեկնաբանությունները անվանեց «անընդունելի»։ «Հռոմի պապը կաթոլիկ եկեղեցու գլուխն է, և լիովին ճիշտ ու բնական է, որ նա կոչ է անում խաղաղության և դատապարտում է պատերազմի ցանկացած ձև», – ասաց Իտալիայի վարչապետը։ Իր հերթին Դոնալդ Թրամփը խորը հիասթափություն հայտնեց Մելոնիից՝ «անընդունելի» անվանելով նրա հայտարարությունները Հռոմի պապ Լևոն XIV-ի նկատմամբ իր քննադատության վերաբերյալ։