Առաջիկայում հեղուկ գազի պակասորդ և գնաճ կլինի
Wed, 22 Apr 2026 21:15:12 +0400
Երեկ գրել էինք, որ մի շարք գազալցակայաններում հեղուկ գազի դեֆիցիտ կա, նկատվում է նաև հեղուկ գազի գնի բարձրացում։
«Հրապարակ»-ի հետ զրույցում էներգետիկ փորձագետ Վահե Դավթյանը նշեց, որ այս պահին մեծ դեֆիցիտ չի նկատվում, բայց կան նախադրյալներ․ «Մենք գիտենք, որ Իրանից ևս մենք ներկրում ենք հեղուկացված գազ և հաշվի առնելով այն, որ վերջին օրերին բոլոր նախադրյալները կան խոսելու այն մասին, որ կոնֆլիկտային իրավիճակը Իրանում նոր փուլ է մտնում, բնականաբար Իրանը ստիպված է լինելու առաջիկայում սահմանափակել արտահանումը, ինչպես դա արեց էսկալացիայի հենց առաջին օրերին։ Այստեղից կարող է նաև ներկրող շուկաներում որոշակի փոխակերպումներ տեղի ունենալ»։
Անդրադառնալով ռուսական շուկայից ներկրվող հեղուկ գազին՝ Դավթյանը նշեց․ «Այս պահին հեղուկացված գազի արտահանման մասով չկան սահմանփակումներ, բայց մենք օրինակ գիտենք, որ վերջերս Ռուսաստանի կառավարությունն արդեն որոշում կայացրեց նավթամթերքի արտահանման սահմանափակումների վերաբերյալ՝ ներքին շուկան կայունացնելու նպատակով, և վերջին շրջանում հետևում ենք նաև որ քննարկումները տեղափոխվել են նաև հեղուկացված գազի շուկա։ Հետևաբար կարծում եմ, որ Հայաստանի շուկան և մի շարք այլ շուկաներ, որոնք ներկրող են, որոշակի զգայունություն են դրսևորել, ինչը շատ տրամաբանական է»։
Փորձագետի խոսքով այս գործոնները համադրելով առաջիկայում կարող ենք ունենալ որոշակի պակասորդ․ «Ես չեմ խոսում կրիտիկական պակասորդի մասին, բայց կլինի պակասորդ, որը կարտահայտվի որոշակի գնաճի տեսքով»։