Դեսպանատների համար նոր շենքե՞ր կկառուցվեն
Thu, 23 Apr 2026 13:40:29 +0400
Հայաստանի և Ղազախստանի միջև նախատեսվում է կառուցել նոր դիվանագիտական շենքեր՝ երկու երկրների մայրաքաղաքներում։ Համապատասխան համաձայնագրի վավերացումը հաստատվել է Հայաստանի Հանրապետության կառավարության նիստում։
Փաստաթուղթը վերաբերում է հողատարածքների փոխադարձ տրամադրմանը, որի հիման վրա Հայաստանի Հանրապետությունում և Ղազախստանում կկառուցվեն նոր դեսպանատներ։ Նախագիծը ներկայացրել է Հայաստանի Հանրապետության արտաքին գործերի նախարարությունը։
Նշվում է, որ համաձայնագիրը ստորագրվել է 2025 թվականի նոյեմբերի 21-ին և ուղղված է դիվանագիտական ենթակառուցվածքների զարգացմանը։
Ըստ հիմնավորման՝ ներկայումս Ղազախստանում Հայաստանի դեսպանությունն աշխատում է վարձակալվող տարածքում, ինչը երկարաժամկետ հեռանկարում առաջացնում է թե՛ ֆինանսական, թե՛ գործառնական սահմանափակումներ։ Նոր շենքի կառուցումը նպատակ ունի ապահովել ավելի կայուն և արդյունավետ գործունեություն։