Նախարարությունն անտեղյակ է, մարզպետը` բողոք չի ստացել
Mon, 27 Apr 2026 19:15:02 +0400
Ապրիլի 17-ին հարցում եմ արել ԿԳՄՍ նախարար Ժաննա Անդրեասյանին․ «Տավուշի մարզի հանրակրթական դպրոցներում աշակերտներին տրվող անվճար սննդին զուգահեռ աշակերտներից դրամահավաք է արվում՝ ամեն ամիս մոտ 1000 դրամ։ Այդ գումարը ծախսվում է աշակերտների հավելյալ սննդի և դպրոցի ճաշարանում ամանների լվացման հեղուկ գնելու նպատակով։ Դուք տեղյա՞կ եք այդ դրամահավաքից, դա օրինակա՞ն գործընթաց է»։
Նախարարի տեղակալ Արաքսիա Սվաջյանի ստորագրությամբ պատասխանում նշված է․ «Դպրոցական սնունդ» ծրագրի շրջանակում ՀՀ մարզերի 1-4-րդ դասարանների սովորողներին տրամադրվում է անվճար սնունդ ՀՀ պետական բյուջեի միջոցներով: Դպրոցներում հավելյալ սնունդ, մաքրող միջոցներ կամ այլ նպատակով սովորողների ծնողներից դրամահավաք կազմակերպելու ցանկացած փորձ անհրաժեշտ է բացառել հանրակրթական ուսումնական հաստատություններում: Ինչ վերաբերում է գրությամբ նշված դրամահավաքության դեպքին՝ նախարարությունը դրա վերաբերյալ որևէ տեղեկություն չունի»։
Նույն հարցն ուղղել եմ նաև Տավուշի մարզպետին: Մարզպետի աշխատակազմից պատասխանել են․ «Նշված հարցով մարզպետի աշխատակազմ որևէ դիմում-բողոք չի ներկայացվել»։
Այսինքն՝ մարզպետը չի ժխտում, որ մարզի դպրոցներում դրամահավաքություն կա, սակայն ասում է, որ դրա վերաբերյալ իրենք դիմում-բողոք չեն ստացել, իսկ ԿԳՄՍՆ-ն առհասարակ` տեղյակ չէ դրամահավաքից եւ իր ենթակայությամբ գտնվող հաստատություններում ինքնագործունեությամբ են զբաղված։