Թրամփն այս անգամ էլ Գերմանիայի կանցլերին չի «խնայել»
Wed, 29 Apr 2026 13:00:00 +0400
ԱՄՆ նախագահ Դոնալդ Թրամփը կտրուկ քննադատել է Գերմանիայի կանցլեր Ֆրիդրիխ Մերցին Իրանի դեմ պատերազմի վերաբերյալ նրա դիրքորոշման համար: Սպիտակ տան ղեկավարը համապատասխան գրառում է արել TruthSocial սոցցանցում։
«Գերմանիայի կանցլեր Ֆրիդրիխ Մերցը կարծում է, որ Իրանի համար միջուկային զենք ունենալը նորմալ է: Նա չգիտի, թե ինչի մասին է խոսում: Եթե Իրանը միջուկային զենք ունենար, ամբողջ աշխարհը պատանդ կլիներ», – գրել է ամերիկացի առաջնորդը։
Թրամփը հավելել է. «Ես հիմա Իրանի հետ անում եմ այն, ինչ վաղուց պետք է անեին այլ երկրներ կամ նախագահներ: Զարմանալի չէ, որ Գերմանիան այդքան վատ վիճակում է՝ տնտեսապես և մնացած ամեն ինչով»։
Ապրիլի 27-ին Մերցը, ելույթ ունենալով Գերմանիայի արևմտյան մասում գտնվող Մարսբերգ քաղաքի ավագ դպրոցի աշակերտների առջև, հայտարարել է, որ Միացյալ Նահանգները «ակնհայտորեն» չունի Իրանի դեմ պատերազմի ռազմավարություն, այդ թվում՝ թե ինչպես այն պետք է ավարտվի: «Այս պահին ես չեմ հասկանում, թե ինչ ռազմավարական տարբերակ կընտրեն ամերիկացիները, հատկապես այն պատճառով, որ իրանցիները ակնհայտորեն շատ հմուտ են բանակցություններում, կամ, ավելի ճիշտ, շատ հմուտ են չբանակցելու մեջ», – հայտարարել է կանցլերը։
Ըստ նրա՝ Իրանի դեմ պատերազմ սկսելու որոշումը չմտածված էր։ Գերմանիայի կանցլերը կրկնել է նախկինում հնչեցրած իր այն տեսակետը, որ ԱՄՆ-ն և Իսրայելը պատերազմ են սկսել Իրանի դեմ՝ առանց եվրոպացիների հետ նախնական խորհրդակցությունների։