Ազգային ժողովի առաջիկա ընտրություններին մասնակցելու համար դիմած քաղաքական ուժերի մի մասի փաստաթղթերում խնդիրներ են արձանագրվել։ Կենտրոնական ընտրական հանձնաժողովը հայտնել է, որ ներկայացված հայտերից 8-ը պարունակում են թերություններ։

Հանձնաժողովի նիստում որոշվել է այդ ուժերին տրամադրել 48 ժամ՝ հայտնաբերված անճշտությունները շտկելու և անհրաժեշտ փաստաթղթերը լրացնելու համար։

Խնդիրներ արձանագրված քաղաքական ուժերի թվում են՝ «Ազգային ժողովրդավարական բևեռ» համահայկական կուսակցությունը, «Հայ ազգային կոնգրես»-ը, «Հանրապետություն» կուսակցությունը, «Բոլորին դեմ եմ» ժողովրդավարական կուսակցությունը, «Ալյանս» կուսակցությունը, «Դեմոկրատիա, օրենք, կարգապահություն» կուսակցությունը, «Ուժեղ Հայաստան» կուսակցությունը, ինչպես նաև «Հանուն հանրապետության» ժողովրդավարության պաշտպանների դաշինքը։

Հիշեցնենք, որ Հայաստանում խորհրդարանական ընտրությունները նախատեսված են 2026 թվականի հունիսի 7-ին։ Ընդհանուր առմամբ, ընտրություններին մասնակցելու հայտ է ներկայացրել 19 քաղաքական ուժ, որոնցից 17-ը կուսակցություններ են, իսկ 2-ը՝ դաշինքներ։