2026-ի խորհրդարանական ընտրություններին 19 քաղաքական ուժ մասնակցության հայտ է ներկայացրելԼ Հանրությունը ուշի ուշով հետևում է ներքաղաքական գործընթացներին, և վերլուծություններ անում, թե որ ուժերը կհաղթահարեն անցողիկ շեմը, քանի ուժ կանցնի խորհրդարան, նոր խորհրդարանը քանի՞ խմբակցությունից բաղկացած կլինի և այլն: Որքան շատ ուժեր անցնեն խորհրդարան, այնքան հավանական կդառնա իշխանափոխությունը։

Մենք փորձեցինք հետահայաց ուսումնասիրել, թե երբ է խորհրդարանն ամենաշատ խմբակցություններն ունեցել: Ազգային ժողովի կայքէջում փոքրիկ ուսումնասիրություն կատարեցինք ու պարզեցինք, որ Հայաստանի Ազգային ժողովի պատմության մեջ խմբակցությունների ամենամեծ թիվը եղել է 6-ը։ Այսինքն, խորհրդարան է անցել 6 քաղաքական ուժ: Դա մեր նախորդ պատմության ընթացքում եղել է 2 անգամ՝ ԱԺ երկրորդ գումարման խորհրդարանը՝ 1999–2003 թթ. և հինգերորդ գումարմանը՝ 2012–2017 թթ.: Համեմատության համար նշենք, որ օրինակ, 6-րդ գումարման խորհրդարանում (2017–2018 թթ) ընդամենը 4 խմբակցություն է եղել: Իսկ 2018-ից հետո ավելի պակաս (3–4): Իսկ նախորդ խորհրդարան անցան ընդամենը 3 ուժ, որոնցից մեկը նույնիսկ անցողիկ շեմը չէր հաղթահարել՝ օրենքի ուժով էր անցել։

Իսկ ամենից շատ խմբակցություններ ունեցած Ազգային ժողովի երկրորդ գումարման՝ 1999–2003 թթ. կազմում եղել են հետևյալ խմբակցությունները` «Միասնություն» դաշինք, Հայ Յեղափոխական Դաշնակցություն (ՀՅԴ), «Օրինաց երկիր» կուսակցություն, Հայաստանի Ժողովրդական կուսակցություն, «Իրավունք և միաբանություն» դաշինք, ինչպես նաև անկախ պատգամավորների խումբ (որոշ ժամանակ գործել է որպես առանձին խմբակցություն/խումբ):

Հինգերորդ գումարման՝ 2012–2017 թթ. կազմում եղել են հետևյալ խմբակցությունները` Հայաստանի Հանրապետական կուսակցություն (ՀՀԿ), «Բարգավաճ Հայաստան» կուսակցություն (ԲՀԿ), Հայ ազգային կոնգրես (ՀԱԿ), «Օրինաց երկիր» կուսակցություն (ՕԵԿ), Հայ Յեղափոխական Դաշնակցություն (ՀՅԴ), «Ժառանգություն» կուսակցություն:

Փաստորեն, բավականին դեմոկրատական երկիր ենք ունեցել եւ ընտրողներն էլ այսքան բեւեռացված չեն եղել՝ տարբեր ուժերի են ձայն տվել եւ նորմալ խորհրդարաններ են անցյալում ձեւավորվել։