Նոր մանրամասներ դասախոսների ձերբակալությունից
Fri, 15 May 2026 21:10:19 +0400
Երեկ «Հրապարակը» գրել էր, որ Հակակոռուպցիոն կոմիտեում նախաձեռնված քրեական վարույթի շրջանակներում ձերբակալվել են Վալերի Բրյուսովի անվան պետական համալսարանի ռոմանագերմանական և ռուս բանասիրության ամբիոնի վարիչ Գայանե Եղիազարյանը և մի քանի դասախոսներ։ Հակակոռուպցիոն կոմիտեից անուններ չէին հայտնել, սակայն հաստատել էին ձերբակալությունների մասին տեղեկությունը։
Բրյուսովի անվան համալսարանի նախկին պրոռեկտոր Ցոլակ Ակոպյանը «Հրապարակին» հայտնել էր, որ ձերբակալված ամբիոնի վարիչը ռեկտոր Դավիթ Գյուրջինյանի թիմակիցն է։ «Գյուրջինյանի թիմակիցն է նա, ես նրա մասին եկեք կարծիք չհայտնեմ, սակայն Գյուրջինյանի ղեկավարած բուհից ամեն ինչ սպասելի է», – ասել էր Ակոպյանը: Մեր զրուցակիցը նշել էր, որ տեղյակ չէ, թե ինչու են ձերբակալել դասախոսներին:
Մեր տեղեկություններով՝ դասախոսների ձերբակալությունը կապված է կաշառք տալու-վերցնելու հետ: Իրավապահ համակարգի մեր աղբյուրի խոսքով` ձերբակալված դասախոսներից մեկը` անգլերենի ամբիոնի դասախոս Աննա Աղայանն է: Դասախոսներին մեղադրում են կաշառք վերցնելու մեջ: Մեր աղբյուրի խոսքով` դասախոսներին կալանավորելու միջնորդություն չի ներկայացվել, խափանման միջոց է ընտրվել ստորագրությամբ երկրից չբացակայելու արգելքը, իսկ ամբիոնի վարիչ Գայանե Եղիազարյանի պաշտոնավարումը կասեցնելու համար Հակակոռուպցիոն կոմիտեն միջնորդություն է ներկայացրել դատարան: