Հրապարակվել են որոշ թվեր, թե ինչքան գումար է ծախսվել Եվրոպական քաղաքական համայնքի 8-րդ գագաթնաժողովի կազմակերպման վրա Հայաստանի բյուջեից: Հայաստան ժամանած հյուրերի կեցությունն ապահովելու համար վարչապետին ենթակա Պետական պահպանության ծառայությունը Երևանի կենտրոնում գտնվող 12 հյուրանոցի հետ մայիսի 2-5-ի կեցության համար պայմանագրեր է կնքել։ Պայմանագրերի ընդհանոր արժեքը կազմել է 17 մլն 45 հազար դրամ կամ շուրջ 46 հազար դոլար։

«Հոլիդեյ ին» հյուրանոցում ամրագրվել է 5 համար, որոնց դիմաց մեկ գիշերվա համար բյուջեից վճարվել է 92 հազար դրամ, ընդհանուր՝ 1 մլն 129 հազար դրամ։ «Գրանդ հոթել»-ում 7 սենյակ է ամրագրվել՝ 1 մլն 365 հազար դրամ ընդհանուր արժեքով։ «Մարիոթ»-ում 2 սենյակում 4 հյուրերի կացության արժեքը կազմել է 1 մլն 280 հազար դրամ։ «Ստելար գլոբալ»-ում 3 անձի 1 օրվա գիշերակացի համար վճարվել է 834 հազար 750 դրամ։ «Դվին հյուրանոցային համալիր»-ին վճարվել է 2 մլն 132 հազար դրամ՝ 7 համարի ամրագրման համար։ «Ռեդիսոն բլյու»-ում ամրագրված 6 համարների արժեքը կազմել է 1 մլն 296 հազար դրամ։ «Ռամադա հոթել»-ում՝ 3 սենյակ՝ 207 հազար դրամ արժեքով։ «Դաբլթրի բայ Հիլթոն»-ում՝ 5 սենյակ՝ 794 հազար դրամ արժեքով։ «Ալեքսանդր Հոթել»-ին 4 սենյակ՝ 2 օրով ամրագրելու համար բյուջեից վճարվել է 3 մլն 640 հազար դրամ։ «Թուֆենկյան» հյուրանոցում 3 հյուրի կացության համար վճարվել է 873 հազար դրամ։ «Մարիոթ Երևան»-ում 7 սենյակի համար վճարվել է 1 մլն 545 հազար 600 դրամ, իսկ «Գոլդեն փելես»-ում՝ 5 համարի վարձակալության համար՝ 1 մլն 950 հազար դրամ։

Նշենք, որ տարբեր հյուրանոցներում հյուրերը տարբեր ժամանակահատվածով են մնացել՝ գերակշռող դեպքերում 2 կամ 3 օրով։

Հավելենք, որ այս ցանկում ներառված չէ Էմանուել Մակրոնի գլխավորությամբ Ֆրանսիայից ժամանակ պատվիրակության գիշերակացը։ Ավելի վաղ գրել էինք, որ վերջինս «Մարիոթ»-ի նախագահական համարում է հանգրվանել, որտեղ մեկ օրվա արժեքն 900 հազար դրամ է։