Ոչ միայն ծաղիկներ, այլև՝ միրգ-բանջարեղեն․ ՀՀ-ից ՌԴ ներմուծման արգելքի շղթան մեծանում է
Fri, 22 May 2026 13:24:04 +0400
Ռոսսելխոզնադզորի ղեկավար Սերգեյ Դանկվերտի խոսքով՝ Հայաստանից արտադրանքի ներմուծման հետ կապված խնդիրները վերաբերում են ոչ միայն ծաղիկներին, այլև մրգերին և բանջարեղենին, ըստ ՏԱՍՍ-ի։
Նրա խոսքով՝ ռուսական կողմը խախտումներ է գրանցում հայկական արտադրանքի ներմուծման մեջ։ Գործակալությունը լրացուցիչ մանրամասներ չի տրամադրել։
Ռոսսելխոզնադզորն ավելի վաղ հայտարարել էր, որ մայիսի 22-ից սկսած ժամանակավորապես կսահմանափակի Հայաստանից ծաղիկների ներմուծումը մինչև ջերմոցային տնտեսությունների ստուգումների ավարտը և արդյունքների վերլուծությունը։
Գործակալությունը դա կապել է հայկական արտադրանքում կարանտինային օրգանիզմների շարունակական հայտնաբերման հետ։
ՀՀ էկոնոմիկայի նախարար Գևորգ Պապոյանը հայտարարել է, որ հայկական կողմը սահմանափակումների մասին պաշտոնական ծանուցում չի ստացել։ Նա հավելել է, որ Ռոսսելխոզնադզորի մասնագետներն արդեն ստուգումներ են անցկացնում Հայաստանում գտնվող ջերմոցներում և ընկերություններում, և որ ՀՀ իշխանությունները բանակցություններ են վարում ռուսական կողմի հետ։
Ռոսսելխոզնադզորը հայտնել է 2025 թվականին Հայաստանից ծաղիկների ներմուծման մեջ խախտումների թվի աճի մասին։ Այդ ժամանակ գործակալությունը հայտնել էր, որ արտադրանքի մեջ ավելի ու ավելի հաճախ են հայտնաբերվում կարանտինային վերահսկողության ենթակա օրգանիզմներ։
Դրանից հետո Ռուսաստանը և Հայաստանը բանակցություններ վարեցին, և հայ ծաղկավաճառները բողոքի ցույցեր կազմակերպեցին արտահանման հետ կապված խնդիրների պատճառով։