«Սա արդեն անձնական վենդետա է»
Fri, 05 Jun 2026 12:14:05 +0400
ԱԺ «Պատիվ ունեմ» խմբակցության ղեկավար Հայկ Մամիջանյանը Քննչական կոմիտեի Երևանի տարածքային ստորաբաժանման դիմաց հայտարարեց, որ Հայաստանում քաղաքական հետապնդումների ենթարկվող անձանց թիվը վերջին շրջանում զգալիորեն աճել է։ Նրա գնահատմամբ՝ եթե մինչև ընտրական գործընթացի մեկնարկը երկրում եղել է ավելի քան 50 քաղբանտարկյալ, ապա այժմ այդ թիվը կրկնապատկվել է։
Մամիջանյանը հիշատակեց Արմեն Աշոտյանի, Դավիթ Համբարձումյանի և ընտրություններին մասնակցող թեկնածու Սամվել Կարապետյանի անունները՝ նշելով, որ նրանք տարբեր ժամանակահատվածներում զրկվել են ազատությունից կամ ենթարկվել սահմանափակումների։
Խոսելով Արմեն Աշոտյանի շուրջ զարգացումների մասին՝ ընդդիմադիր պատգամավորը նշեց, որ վերջինիս ակտիվ քաղաքական գործունեությունն ու նախորդ օրը տեղի ունեցած հրապարակային քննարկումները հաշվի առնելով՝ տեղի ունեցող գործընթացները կանխատեսելի էին։ Նրա կարծիքով՝ իշխանությունների գործողությունները հերթական ճնշումների դրսևորում են։
Մամիջանյանի համոզմամբ՝ ընտրական գործընթացի արդարության մասին խոսելն անհնար է, երբ քաղաքական հիմնական դերակատարների նկատմամբ կիրառվում են սահմանափակումներ, իսկ որոշ դեպքերում նրանք զրկվում են ազատությունից։ Նա ընդգծեց, որ Արմեն Աշոտյանի նկատմամբ իրականացվող քայլերը վաղուց արդեն քաղաքական հարթությունից տեղափոխվել են անձնական հակամարտության դաշտ։ Պատգամավորը հիշեցրեց, որ ՀՀԿ փոխնախագահը շուրջ երկու տարի գտնվել է անազատության մեջ կամ տարբեր սահմանափակումների ներքո։
Ըստ նրա՝ այդ միջոցները չեն կարողացել ազդել Աշոտյանի քաղաքական գործունեության վրա, քանի որ վերջինս շարունակել է ակտիվ մասնակցել հանրային և քաղաքական գործընթացներին։
«Ընտրություններն արդեն կեղծվում են, եթե հիմնական բոլոր դերակատարներին փորձում են խոչընդոտել, ազատությունից զրկել, ինչի մասին է խոսքը։ Իսկ Արմեն Աշոտյանի պարագայում սա արդեն անձնական վենդետա է»,- նշել է նա: