«Հատիսի բարձունքում խորհրդանշական 50․000-րդ կամավորի հավաստագիրը հանձնվեց Արամոյին
Fri, 05 Jun 2026 21:10:58 +0400
Քարոզարշավի վերջին օրը առանձնահատուկ խորհուրդ ունի։ Նման արձանագրմամբ է հանդես եկել ԲՀԿ նախագահ Գագիկ Ծառուկյանը։
Նրա ֆեյսբուքյան գրառման մեջ ասվում է.
«Հատիսի բարձունքում սպասում ենք համազգային նախաձեռնության խորհրդանշական 50․000-րդ կամավորին՝ ՀՀ վաստակավոր արտիստ Արամոյին։
Այս բարձունքը դարձել է համախմբման յուրօրինակ խորհրդանիշ։ Այստեղ են եկել մարդիկ Հայաստանի ամենահեռավոր բնակավայրերից, Սփյուռքից և աշխարհի տարբեր մայրցամաքներից։ Նրանց միավորել է մեկ գաղափար՝ մասնակցել մի գործի, որը պատկանում է ամբողջ հայությանը։ Այստեղ յուրաքանչյուր մարդ զգում է, որ իր մասնակցությամբ թողնում է սեփական հետքը և դառնում մեծ պատմության մի մասը։
Կամավորներին հանձնվող հավաստագրերը պարզապես վկայագրեր չեն։ Դրանք հիշողություն են, պատասխանատվություն և հպարտություն։ Տարիներ անց այս մարդիկ իրենց զավակներին ու թոռներին պատմելու են, որ եղել են ազգային նշանակության այս նախաձեռնության մասնակիցները։
«Հատիսը» պարզապես նախագիծ չէ։ Այն հավատ է, հիշողություն և համախմբման գաղափար, որը միավորում է հայությանը։ Այդ պատճառով էլ կարևոր է, որ յուրաքանչյուր հայ իրեն զգա այս մեծ գործի մասնիկը»։