Տնային կալանքի պայմաններում գտնվող Բագրատ Սրբազանը լրագրողների հետ զրույցում հայտարարել է, որ երբևէ չի ակնկալել և չի հավատացել, թե իր նկատմամբ կիրառված կալանքը կարող է փոխարինվել այլ խափանման միջոցով։ Նրա խոսքով՝ իր համար անընդունելի են եղել նման բոլոր տարբերակները։

Անդրադառնալով այն հարցին, թե արդյոք ներքուստ հաշտվել էր կալանքի կարգավիճակի հետ, Սրբազանը նշել է, որ դա երբեք չի ընկալել որպես իրավիճակ, որի հետ պետք է համակերպվել։ Նրա բնորոշմամբ՝ այդ շրջանը եղել է իր պայքարի մի մասը և յուրատեսակ խրամատ։

Խոսելով այն մասին, որ տնային կալանքը կրելու է իր փաստաբան Տաթևիկ Սողոյանի բնակարանում, Բագրատ Սրբազանը պարզաբանել է, որ իր պաշտպանական թիմը դատարանին որևէ հասցե չի ներկայացրել։ Նրա խոսքով՝ համապատասխան հասցեն ընտրվել է նախորդ փաստաթղթերից վերցված տվյալների հիման վրա և վերջնական որոշումը կայացվել է վերջին պահին։ Միաժամանակ նա հեգնական տոնով անդրադարձել է իր գույքային հնարավորությունների վերաբերյալ շրջանառվող կարծիքներին։

Սրբազանը նշել է, որ իրեն հանգիստ է զգում և ընդգծել, որ ֆիզիկական տարածքն ու ժամանակային սահմանափակումները իր համար որոշիչ նշանակություն չունեն։ Նրա խոսքով՝ առաջնայինը սեփական ժամանակն ու տարածությունը տնօրինելու ներքին ազատությունն է։

Անդրադառնալով ընտրություններին՝ Բագրատ Սրբազանը քաղաքացիներին կոչ է արել ակտիվորեն մասնակցել քվեարկությանը՝ ընդգծելով, որ դա ոչ միայն իրավունք է, այլև պատասխանատվություն։ Նա նշել է, որ մարդիկ չպետք է թույլ տան, որպեսզի ուրիշներն իրենց փոխարեն որոշեն երկրի և իրենց կյանքի հետագա ընթացքը։

Հարցին, թե ընտրությունների միջոցով հնարավո՞ր է հասնել իշխանափոխության, Սրբազանը պատասխանել է, որ կարևոր չէ հնարավոր կամ անհնար լինելու հարցը։ Նրա համոզմամբ՝ առաջնայինը հասկանալն է, թե արդյոք փոփոխությունն անհրաժեշտ է, և ինքը կարծում է, որ նման փոփոխության անհրաժեշտություն կա։