Ինչպես են մեղադրանք առաջադրել Ծառուկյանին՝ առանց ԿԸՀ-ի
Wed, 10 Jun 2026 12:15:38 +0400
Կենտրոնական ընտրական հանձնաժողովի նախագահ Վահագն Հովակիմյանը հայտարարել է, որ չի կարող մեկնաբանել այն հանգամանքը, թե ինչպես է Դատախազությունը, առանց ԿԸՀ համաձայնության, մեղադրանք առաջադրել պատգամավորի թեկնածու Գագիկ Ծառուկյանին։
Ազգային ժողովում լրագրողների հետ զրույցի ընթացքում Հովակիմյանը նշել է, որ այդ հարցերի հասցեատերը Դատախազությունն է, ոչ թե Կենտրոնական ընտրական հանձնաժողովը։
Նրա խոսքով՝ թեկնածուն իրավունք ունի օրենքով սահմանված կարգով բողոքարկել դատախազության որոշումը, սակայն ԿԸՀ-ից պահանջել գնահատական տալ կամ մեկնաբանել իրավապահ մարմնի գործողությունները՝ ճիշտ մոտեցում չէ։
Հովակիմյանը շեշտել է, որ Դատախազության կայացրած որոշումների վերաբերյալ պարզաբանումներ պետք է պահանջել հենց այդ կառույցից։