Թուրքիայի ԱԳ նախարար Հաքան Ֆիդանը հայտարարել է, որ Հարավային Կովկասում վրա է հասնում այն ժամանակաշրջանը, երբ հարկ է մրցակցությունից անցնել համագործակցության։ Այս մասին հայտնում է Türkiye Gazetesi-ն։ Ամփոփելով Ռուսաստան օրերս կատարած այցը՝ նախարար Ֆիդանը ասել է, որ համաձայնություն է ձեռք բերվել «3+3» ֆորմատի գործարկման եւ այդ շրջանակում աշխատանքներ իրականացնելու ուղղությամբ։ Ֆորմատում են Թուրքիան, Ռուսաստանը, Իրանը, Հայաստանը Ադրբեջանը, Վրաստանը։

Ֆիդանը կարեւոր է համարել «3+3» մեխանիզմը՝ ռեգիոնալ երկրների միջեւ համագործակցության համար։ Ֆիդանը նշել է, որ տիրապետություն հաստատելուն պետք է փոխարինի համագործակցությունը եւ դա ավելի կամրապնդի կայունությունն ու բարգավաճումը Հարավային Կովկասում եւ Կենտրոնական Ասիայում։ Խաղաղությունն ու կայունությունը, ըստ նրա, օգտակար կլինեն բոլորին։ Թուրքիայի արտաքին քաղաքական գերատեսչության ղեկավարը նաեւ ասել է, որ «3+3» ֆորմատով հնարավոր կլինի բազմաթիվ նախագծեր իրականացնել Կովկասում։