ԱՄՆ սենատի բանաձևը կոչ է անում Թրամփին դադարեցնել Իրանի դեմ ռազմական գործողությունները
Wed, 24 Jun 2026 11:53:30 +0400
ԱՄՆ սենատը հավանություն է տվել բանաձևին, որը պահանջում է, որ ԱՄՆ նախագահ Դոնալդ Թրամփը դադարեցնի Իրանի դեմ ռազմական գործողությունները, որոնք նա նախաձեռնել էր առանց Կոնգրեսի հավանության, հայտնում է ՌԻԱ Նովոստին։
Նշվում է, որ նախաձեռնությանը աջակցել է 50 օրենսդիր, այդ թվում՝ հանրապետականներ Բիլ Քեսիդին, Սյուզան Քոլինզը, Լիզա Մուրկովսկին և Ռենդ Փոլը։ Դեմ են հանդես եկել 48 սենատորներ, այդ թվում՝ դեմոկրատ Ջոն Ֆետերմանը։
Բանաձևը պահանջում է դադարեցնել ԱՄՆ զինված ուժերի մասնակցությունը Իրանի դեմ ռազմական գործողություններին, որոնք արտոնված չեն եղել Կոնգրեսի կողմից։ Կոնգրեսի երկու պալատների կողմից ընդունված այս բանաձևը օրենքի ուժ չունի և նախագահի ստորագրություն չի պահանջում։
Հիշեցնենք` Իրանն ու ԱՄՆ-ն հունիսի 18-ի գիշերը հեռավար ձևաչափով հուշագիր ստորագրեցին, որի նպատակն է դադարեցնել փետրվարի 28-ին սկսված ռազմական հակամարտությունը: Հուշագիրը նաև ժամկետ է սահմանում, թե երբ ԱՄՆ-ն կվերացնի ծովային շրջափակումը, իսկ Իրանը կվերականգնի Հորմուզի նեղուցի նավարկությունը:
Հունիսի 21-ին շվեյցարական Բյուրգենշտոկ քաղաքում տեղի ունեցան Իրանի և ԱՄՆ-ի միջև տեխնիկական բանակցությունները՝ Կատարի և Պակիստանի միջնորդությամբ:
Բանակցություններից հետո հայտարարվեց, որ Իրանն ու ԱՄՆ-ն Կատարի և Պակիստանի միջնորդությամբ համաձայնեցրել են 60 օրվա ընթացքում վերջնական համաձայնության հասնելու ճանապարհային քարտեզը և մեխանիզմ են ստեղծել հետագա տեխնիկական բանակցությունների համար: