Հունիսի 15-ին հարցում եմ արել ԿԳՄՍ նախարար Ժաննա Անդրեասյանին․ «Ապրիլի 26-ին ատեստացիայի լրացուցիչ փուլ է անցկացվել հանրակրթական դպրոցների այն ուսուցիչների մասնակցությամբ, ովքեր նախկինում 2 եւ ավելի անգամ բացասական արդյունք են ունեցել ատեստավորումից։ Լրացուցիչ այդ ատեստացիան կամավո՞ր, թե՞ պարտադիր է եղել նախկինում 2 եւ ավելի անգամ բացասական արդյունք ունեցած ուսուցիչների համար։ Քանի՞ ուսուցիչ է մասնակցել այս փուլին, քանի՞սն է դրական արդյունք ունեցել, բացասական արդյունք ունեցածները շարունակելո՞ւ են աշխատել հանրակրթական դպրոցներում»։

ԿԳՄՍ փոխնախարար Արթուր Մարտիրոսյանը պատասխանել է․ «Հաշվի առնելով կամավոր ատեստավորման միջոցով ուսուցչի մասնագիտական աճին նպաստելու գործընթացի կարեւորությունը՝ ՀՀ ԿԳՄՍ նախարարությունը նախատեսել է 2026 թ. ապրիլի 25-ին շուրջ 200 ուսուցչի համար կազմակերպել կամավոր ատեստավորման գործընթաց՝ որպես լրացուցիչ փուլ այն ուսուցիչների համար, որոնք երկու անգամ (2024 եւ 2025 թթ.) չեն հաղթահարել կամավոր ատեստավորումը կամ ՀՀ կառավարության 2022 թ. ապրիլի 28-ի N 596-Ն որոշմամբ հաստատված կարգի պահանջի համաձայն՝ վերաատեստավորման արդյունքում 50-59 տոկոս արդյունք չեն ցուցաբերել կամ նախորդ ատեստավորման ամենաբարձր արդյունքի նկատմամբ 15 տոկոսային կետ աճ չեն ապահովել եւ զրկվում են տվյալ առարկայի դասավանդման իրավունքից, իսկ միայն տվյալ առարկան դասավանդելու դեպքում ենթակա են ազատման»:

Նախարարի տեղակալը չի պատասխանել հարցին, թե շուրջ 200 ուսուցչից վերաատեստավորման այդ փուլում քանիսը 50-59 տոկոս արդյունք չեն ցուցաբերել կամ նախորդ ատեստավորման ամենաբարձր արդյունքի նկատմամբ 15 տոկոսային կետ աճ չեն ապահովել։ Կարող եմ ենթադրել, որ վերաատեստավորումից «կտրվածների» թիվը շատ մեծ է, ուստի չեն ուզում այն հանրայնացնել։