Ինչպես հայտնի է, հուլիսի 7-ին, Թուրքիայի մայրաքաղաք Անկարայում մեկնարկելու է ՆԱՏՕ-ի գագաթնաժողովը։ Գագաթնաժողովին մաս­նակ­ցելու է նաեւ ԱՄՆ նախագահ Դոնալդ Թրամփը` ըստ նախնական պայմանավորվածությունների, որոնց մասին նաեւ հնչել են հանրային պաշտոնական հայտարարություններ։ ՌԴ կառավարությանը կից գործող Ֆինանսական համալսարանի քաղաքագիտության ամբիոնի պրոֆեսոր Ալեքսանդր Շատիլովի կարծիքով, սպասվող գագաթնաժողովը խոստանում է լինել բավականին լարված։
Ռուսական Международная жизнь պարբերականի հետ զրույցում նա ասել է, որ քննարկվելու են բավականին շատ խճճված ու կնճռոտ հարցեր, որոնք վերաբերելու են թե՛ դաշինքի ներքին կյանքին, թե՛ արտաքին հարցերին։ «Հասկանալի է, որ հիմնական օրակարգային հարցը լինելու է Ուկրաինային ցուցաբերվելիք աջակցությունը, քանի որ ՆԱՏՕ-ն, փաստացի, գրեթե ողջ կազմով լծված է Ուկրաինային օգնելուն։ Նույնիսկ Միացյալ Նահանգներն է հիմա միացել Զելենսկու վարչակարգի աջակիցներին, եւ կարծում եմ, որ գագաթնաժողովի ժամանակ հիմնական հարցը լինելու է այն, թե ինչպես պետք է կանգնեցնել Ռուսաստանին՝ Ուկրաինայում»։ Փորձագետը նշում է, որ անպայման կքննարկվի այն հարցը, թե արդյոք կարո՞ղ է ուկրաինական ճգնաժամը վերածվել Ռուսաստան-ՆԱՏՕ գլոբալ բախման, եւ եթե այո, ապա ով է մասնակցելու դրան։

«Տեսնում ենք, որ չնայած ագրեսիվ հռետորաբանությանը, եվրոպացիների մեծ մասը պատրաստ չէ Ռուսաստանի դեմ ռազմական զորակազմ հակադրելու եւ պատրաստ է միայն նյութական կամ ռազմատեխնիկական աջակցություն ցուցաբերելու»։ Շատիլովն արձանագրում է, որ քչերն են իրականում ցանկանում ռեալ իրականության մեջ բախվել Ռուսաստանի հետ՝ ռազմական առումով։ «Թերեւս միայն բալթիկացիներն ու լեհերը, բայց դե՝ նրանք 2014 թվականից ռազմաճակատում են։ Հնարավոր է, որ փորձեն Էրդողանին էլ ներգրավել, թե արդյոք, եթե գլոբալ առճակատում սկսվի Ռուսաստանի եւ Եվրոպայի միջեւ, կմիանա՞ նա այդ առճակատմանը»։ Շատիլովը նշում է, որ Էրդողանը դեռ չեզոք ու ճկուն կեցվածք է պահում, սակայն հնարավոր է, որ նրա նկատմամբ նույնպես Թրամփը ճնշում գործադրի, քանի որ շատ կարեւոր է, որ Թուրքիան էլ ներգրավվի այդ գլոբալ բախման մեջ։ Հատկապես որ թուրքական բանակն աշխարհի լավագույն բանակներից է, եւ, ըստ փորձագետների, դժվար թե «եվրոպական խաժամուժը» հրաժարվի այդ բանակը հանուն իրեն ծառայեցնելու մտքից։

Ներքին խնդիրների հետ կապված, Շատիլովը նշել է, որ հիմնական խնդիրը կապված է լինելու այն բանի հետ, թե ով որքան է «գումար գցելու ընդհանուր գանձանակի մեջ»։ Թրամփն ամեն կերպ կթիրախավորի մյուսներին՝ ժլատության եւ դաշինքի ընդհանուր գանձանակի մեջ ավել գումար գցելու ցանկության բացակայության համար։ Առաջիկայում Թրամփը ներամերիկյան հարթությունում կարեւոր իրադարձություն ունի՝ Կոնգրեսի միջանկյալ ընտրությունները, եւ շատ կարեւոր է, որ կարողանա ստիպել, որ եվրոպացիներն իրենց գրպանները լայն բացեն դաշինքի գանձանակի համար։ Եթե դա հաջողվի, ապա Թրամփը դա անպայման նախընտրական արշավում կմատուցի որպես իր հաղթանակներից մեկը՝ ամփոփել է ռուս քաղաքագետը։