Վարդավառը Գյումրիում. վերամբարձ կռունկներ, հրշեջ մեքենաներ
Sun, 12 Jul 2026 13:29:39 +0400
Գյումրին այսօր ապրում էր իր ամենաուրախ, ամենաթաց ու աշխույժ օրերից մեկը։ Հիսուս Քրիստոսի Պայծառակերպության տոնը՝ Վարդավառը, Շիրակի մարզկենտրոնում նշվեց իսկական ժողովրդական հանդիսությամբ, որի կենտրոնը դարձյալ Վարդանանց հրապարակն էր։
Գյումրեցիներին ջրելու հարցում «օգնության» էին հասել նաև հատուկ տեխնիկաներն ու քաղաքային ծառայությունները՝ տոնին հաղորդելով մասշտաբային ու կազմակերպված բնույթ։
Տոնակատարության ամենատպավորիչ տեսարաններն արձանագրվեցին հենց հրապարակի կենտրոնում։ Ջրային «մարտերն» էլ ավելի թեժացնելու համար գործի էին դրվել ոչ միայն ավանդական դույլերն ու ջրային ատրճանակները, այլև արտակարգ իրավիճակների նախարարության հրշեջ մեքենաները, որոնց հզոր ջրաշիթերի տակ հավաքվել էին հարյուրավոր քաղաքացիներ։
Սակայն գյումրիական սրամտությունն ու կրեատիվությունը սրանով չսահմանափակվեցին։ Տոնի մասնակիցներին անակնկալի բերեց հրապարակում հայտնված վերամբարձ կռունկը։ Բարձրությունից տեղացող ջրի շիթերը իսկական իրարանցում ու ոգևորություն առաջացրեցին ներքևում գտնվողների շրջանում՝ Վարդավառի ավանդական արարողությունը վերածելով ժամանակակից ու հիշվող շոուի։