Որն էր պարտության գլխավոր պատճառը
Wed, 15 Jul 2026 13:30:35 +0400
Ֆրանսիայի ազգային հավաքականի արդեն նախկին գլխավոր մարզիչ Դիդիե Դեշամը անդրադարձել է աշխարհի առաջնության կիսաեզրափակիչում Իսպանիայից կրած պարտությանը։ Ֆրանսիացիները հանդիպումը զիջել են 0։2 հաշվով և զրկվել եզրափակիչ դուրս գալու հնարավորությունից։
Դեշամի խոսքով՝ թիմի ֆուտբոլիստները ծանր հոգեբանական վիճակում են, սակայն պարտության պատճառները պետք է գնահատել սառը դատողությամբ։
«Ֆուտբոլիստները հիմա հոգեպես շատ ծանր վիճակում են, բայց պետք է օբյեկտիվ լինենք։ Մենք զիջեցինք տեխնիկական առումով, և դրա պատասխանատվությունը մեզ վրա է։ Կային բազմաթիվ վիճելի դրվագներ, սակայն գլխավոր պատճառը այն է, որ Իսպանիան այս խաղում ավելի ուժեղ էր»,- նշել է ֆրանսիացի մասնագետը։
Դեշամը նաև կասկած է հայտնել հանդիպման մրցավարության վերաբերյալ՝ նշելով, որ կային դրվագներ, որոնք հարցեր են առաջացրել։
«Ես պարզապես մի հարց կտամ և չեմ պատասխանի դրան՝ արդյո՞ք այս մրցավարն ուներ աշխարհի առաջնության կիսաեզրափակիչում աշխատելու անհրաժեշտ մակարդակը»,- ասել է նա։
Ֆրանսիայի հավաքականի գլխավոր մարզիչը ընդգծել է, որ նման մակարդակի խաղերում յուրաքանչյուր սխալ կարող է վճռորոշ լինել։
«Մենք թույլ տվեցինք տեխնիկական սխալներ, որոշ փոխանցումներ կարող էին վտանգավոր իրավիճակների բերել։ Ֆուտբոլի բարձրագույն մակարդակում նման պահերը հատկապես ցավալի են»,- նշել է Դեշամը։
Միևնույն ժամանակ նա ընդունել է Իսպանիայի հավաքականի առավելությունը՝ ընդգծելով, որ մրցակիցը լիովին վերահսկել է խաղի ընթացքը։
«Չեմ ցանկանում թերագնահատել Իսպանիայի հաջողությունը։ Նրանք ամբողջությամբ վերահսկում էին հանդիպումը և արժանիորեն հաղթեցին։ Մենք պետք է հիմա պատրաստվենք երրորդ տեղի համար խաղին։ Այս պարտությունը չի կարող ջնջել այն աշխատանքը, որը կատարվել է մինչ այս, բայց հենց այս խաղում Իսպանիան ավելի լավ տեսք ուներ»,- ասել է Դեշամը։
Դեշամը, հիշեցնենք, հեռացվել է գլխավոր մարզչի պաշտոնից, Ֆրանսիայի ընտրանին գլխավորելու է լեգենդար Զինեդին Զիդանը: