Անխոցելի մարդ, ինչպես տեսնում եք, չկա
Wed, 15 Jul 2026 15:35:00 +0400
Գյումրու քաղաքապետի պաշտոնակատար Ավետիս Առաքելյանը ճեպազրույցի ընթացքում անդրադարձել է իր հնարավոր՝ Ազգային ժողով անցնելու և ավագանու մանդատից հրաժարվելու թեմային՝ պատասխանելով այն հարցին, թե արդյոք կարող է հրաժարվել պատգամավորական հեռանկարից՝ հաշվի առնելով, որ քրեական գործերով է անցնում։
Առաքելյանը նշել է, որ որևէ մեկին չի կարելի անխոցելի համարել՝ ընդգծելով, որ նման իրավիճակում կարող է հայտնվել ցանկացած մարդ։ Նա նաև լրագրողներին հիշեցրել է, որ նախկինում իշխանությունների կողմից հնչել են հայտարարություններ այն մասին, թե տարբեր անձինք կարող են ենթարկվել հետապնդումների։
Պաշտոնակատարի խոսքով՝ իրենց քաղաքական ուժում հնարավոր խոցելիությունը քննարկման առարկա չէ։ Որպես օրինակ՝ նա նշել է ուժի ղեկավար Սամվել Կարապետյանին՝ ընդգծելով, որ վերջինս, իր խոսքով, գտնվում է հետապնդման ներքո և տնային կալանքի տակ։
Առաքելյանը հավելել է, որ, իր գնահատմամբ, ընդդիմադիր բոլոր քաղաքական ուժերն այսօր գտնվում են խոցելի իրավիճակում, սակայն դա, ըստ նրա, չի կարող պատճառ դառնալ, որպեսզի նրանք հրաժարվեն քաղաքական գործունեությունից կամ խորհրդարան գնալուց։