Ինչ է սպասվում ԵՄ ձուկ արտահանող տնտեսվարողներին
Thu, 16 Jul 2026 11:53:10 +0400
Հայաստանի կառավարությունը հաստատել է կարգ, որով սահմանվում են Եվրամիության երկրներ ձուկ և ձկնամթերք արտահանելու ցանկություն ունեցող ընկերությունների գրանցման և վերահսկման ընթացակարգերը։
Նոր կարգի համաձայն՝ արտահանմամբ զբաղվելու համար տնտեսավարողները նախ պետք է դիմեն Սննդամթերքի անվտանգության տեսչական մարմին։ Տեսչությունը կգնահատի՝ արդյոք արտադրական գործընթացները համապատասխանում են Եվրամիության սննդամթերքի անվտանգության պահանջներին։ Դրական եզրակացության դեպքում ընկերության տվյալները կներկայացվեն ԵՄ-ի TRACES վերահսկման համակարգում գրանցման համար։
Կառավարությունը հիշեցնում է, որ Հայաստանը 2025 թվականի մարտի 16-ից ստացել է Եվրամիություն թեփուկավոր ձուկ և դրանից պատրաստված արտադրանք արտահանելու պաշտոնական իրավունք։ Սակայն մինչ այժմ օրենսդրությամբ հստակ սահմանված չէին այն ընթացակարգերը, որոնցով պետք է իրականացվեին արտահանող կազմակերպությունների գրանցումը, գրանցման դադարեցումը և առողջության սերտիֆիկատների տրամադրումը։
Ըստ ընդունված նախագծի՝ TRACES համակարգում գրանցման հիմք կհանդիսանա Հայաստանի լիազոր մարմնի կողմից ներկայացված տեղեկատվությունը, որը Եվրոպական հանձնաժողովի համար կհաստատի, որ տվյալ ընկերությունը համապատասխանում է սահմանված պահանջներին։
Փաստաթղթով նախատեսվում է նաև սահմանել այն դեպքերը, երբ ընկերության գրանցումը կարող է դադարեցվել, ինչպես նաև արտահանվող արտադրանքի համար առողջության սերտիֆիկատ տրամադրելու կարգը։