Ռուսաստանի գյուղատնտեսական վերահսկողության դաշնային ծառայությունը («Ռոսսելխոզնադզոր») սահմանափակել է թուրքական հինգ ընկերության կողմից Ռուսաստան կեռասի, բալի, ծիրանի, դեղձի և նեկտարինի մատակարարումները՝ հայտնաբերված խախտումների պատճառով։ Նրանց մատակարարումների ծավալները ժամանակավորապես կվերաբաշխվեն այլ մատակարարների միջև։

Հուլիսի 18-ից ուժի մեջ մտած որոշմամբ սահմանափակումների տակ են հայտնվել թուրքական FBA Plastik Otomotiv Gida ve Petrol Urunleri, Akas Tarim Urunleri, Situr Sitare Turizm Ticaret, Troy Meyve Sebze Ticareti ve Pazarlama և Faruk Sat-Alfasat Tarim Urunleri ընկերությունները։

«Ռոսսելխոզնադզորի» տվյալներով՝ 2026 թվականի ընթացքում այս հինգ ընկերությունները Ռուսաստան են արտահանել շուրջ 125 հազար տոննա կորիզավոր մրգեր, ինչը կազմում է այդ արտադրանքի ընդհանուր ներմուծման մոտ 12 տոկոսը։ Եթե խախտումները շարունակվեն, սահմանափակումները կարող են տարածվել նաև այլ արտահանողների վրա։

Գերատեսչության հաղորդմամբ՝ որոշման պատճառը թուրքական արտադրանքում պարբերաբար հայտնաբերվող կարանտինային վնասատուներն ու հիվանդություններն են, մասնավորապես՝ շագանակագույն մոնիլիոզային փտախտը, միջերկրածովյան պտղաճանճը, արևմտյան ծաղկային տրիպսը, արևելյան և բալի պտղակեր ցեցերը։ Դրանք վտանգ են ներկայացնում ինչպես բերքի, այնպես էլ պտղատու ծառերի համար։
Սահմանափակումները գործում են անորոշ ժամկետով՝ մինչև «Ռոսսելխոզնադզորը» կրկին հաստատի, որ արտադրանքը համապատասխանում է սահմանված պահանջներին։

Այս որոշումը համընկել է Թուրքիայի արտգործնախարար Հաքան Ֆիդանի՝ Ուկրաինա կատարած այցի հետ։ Հուլիսի 16-ին Կիևում կայացած մամուլի ասուլիսում նա հայտարարել էր, որ Թուրքիան պատրաստ է ստանձնել Ուկրաինայի անվտանգության երաշխիքների ծովային բաղադրիչը։ Մի քանի օր առաջ նաև Թուրքիան և Ուկրաինան վավերացրել էին ազատ առևտրի մասին համաձայնագիրը, որը նախատեսում է մաքսատուրքերի վերացում ուկրաինական մի շարք ապրանքների համար։

Միաժամանակ, հուլիսին «Ռոսսելխոզնադզորը» կանխել է նաև 19 տոննա ադրբեջանական ծիրանի ներմուծումը Ռուսաստան՝ շագանակագույն մոնիլիոզային փտախտի հայտնաբերման պատճառով։ Ապրանքը չի թույլատրվել ռուսական շուկա և վերադարձվել է Ադրբեջան։

Հիշեցնենք, որ հուլիսի 13-14-ին Շուշիում, որը միջազգային մակարդակով ճանաչված է Ադրբեջանի վերահսկողության տակ գտնվող տարածք, Ադրբեջանի նախագահ Իլհամ Ալիևը կոչ էր արել Ուկրաինային չհամակերպվել իր տարածքների ռուսական օկուպացիայի հետ։ Նրա խոսքով՝ Ադրբեջանը հետևողականորեն աջակցում է Ուկրաինայի ինքնիշխանությանն ու միջազգայնորեն ճանաչված սահմանների անձեռնմխելիությանը։
Ալիևը նշել էր, որ դեռ անցյալ տարի խորհուրդ է տվել Ուկրաինային չհամաձայնել տարածքային կորուստների հետ՝ չնայած արտաքին ճնշմանը։

Նա նաև զուգահեռներ էր անցկացրել Լեռնային Ղարաբաղի և Դոնբասի իրավիճակների միջև՝ նշելով, որ 2020 թվականի պատերազմի ընթացքում միջազգային գործընկերները նույնպես կոչ էին անում Ադրբեջանին դադարեցնել ռազմական գործողությունները, սակայն Բաքուն չի հրաժարվել իր հայտարարած նպատակից՝ վերականգնել երկրի տարածքային ամբողջականությունը։

Ադրբեջանի նախագահը հայտնել էր նաև, որ այդ հարցը քննարկել է Ուկրաինայի նախագահ Վլադիմիր Զելենսկու հետ այս տարվա ապրիլին կայացած հանդիպման ժամանակ և ընդգծել, որ Ադրբեջանի դիրքորոշումը Ուկրաինայի նկատմամբ մնում է անփոփոխ։

«Մենք միշտ աջակցել ենք, աջակցում ենք և շարունակելու ենք աջակցել Ուկրաինայի տարածքային ամբողջականությանը, ինքնիշխանությանը և սահմանների անձեռնմխելիությանը։ Ժողովրդի համաձայնության բացակայության դեպքում որևէ պետության սահմաններ չեն կարող փոփոխվել», — հայտարարել էր Ալիևը։

Նա հավելել էր, որ Ադրբեջանը շարունակում է օգնություն ցուցաբերել Ուկրաինային ինչպես պետական մակարդակով, այնպես էլ երկրի քաղաքացիների կողմից։