Բաքվի դատարանում ավարտվել է հայ գերիների վերաքննիչ բողոքների քննությունը
Tue, 28 Jul 2026 22:30:48 +0400
Բաքվի դատարանում ավարտվել է հայ գերիների վերաքննիչ բողոքների քննությունը, հայտնում են ադրբեջանական ԶԼՄ-ները։
Նշվում է, որ պետական մեղադրողների ելույթից հետո խոսքը փոխանցել են Արցախի նախկին նախագահներ Բակո Սահակյանին և Արայիկ Հարությունյանին, ինչպես նաև նրանց «փաստաբաններին»։
Սահակյանն ասել է, որ հաջորդ նիստի ժամանակ ցանկանում է օգտվել ռեպլիկի իրավունքից, իսկ Հարությունյանը մերժել է առաջադրված մեղադրանքները։
Հաջորդ նիստը տեղի կունենա հուլիսի 31-ին:
Հիշեցնենք` ըստ պաշտոնական տվյալների` Ադրբեջանում 19 հայ գերի կա։ Արցախի նախկին ռազմաքաղաքական առաջնորդների գործով «դատավարությունը», որը Բաքվում սկսվել էր 2025 թվականի հունվարին, ավարտվեց այս տարվա փետրվարի 5–ին, և հրապարակվեցին դատավճիռները` ցմահ ազատազրկման դատապարտվեցին Արցախի Հանրապետության նախկին նախագահ Արայիկ Հարությունյանը, ԱԺ նախկին նախագահ Դավիթ Իշխանյանը, ՊԲ նախկին հրամանատար Լևոն Մնացականյանը և ՊԲ հրամանատարի նախկին տեղակալ Դավիթ Մանուկյանը։ Արցախի նախկին նախագահներ Արկադի Ղուկասյանն ու Բակո Սահակյանը դատապարտվեցին 20 տարվա ազատազրկման։