Բոլոլա է լինելու և մեծ սկանդալ
Thu, 30 Jul 2026 15:15:12 +0400
Պահ, պահ, պահ, ազգիս գործիչները մտահոգված են Նիկոլի դուրս տված հերթական էշությամբ: Իբր նա այդ ի՞նչ է ասել, որ այդպես մտահոգվել եք… Թե բա՝ ես Գարեգին Երկրորդ անունով կաթողիկոս չեմ ճանաչում: Ասել է՝ դուք էլ գրական լեզվով պատասխանեք՝ վրան թե չես ճանաչում, կամ ո՞վ է քեզնից սպասում, որ ճանաչես: Էլ խառնվել եք իրար, էլ հայտարարում եք, որ սա հետընտրական Հայաստանում հակաեկեղեցական պայքարի նոր փուլի մեկնարկն է, էլ բան… Կարելի է մտածել՝ նախընտրական Հայաստանում այնքան բան արեց եկեղեցու դեմ, որ քիչ էր մնացել Եկեղեցին քանդվի: Վեհարանն ազատե՞ց Վեհից, Էջմիածնում հոգևոր հանրահավաք պիտի աներ, արե՞ց… Պատարագիչ հոգևորականներին ստիպում էր Ամենայն Հայոց Կաթողիկոսի անունը զեղչել պատարագներից, և հիմա Ի՛նչ է պատահել, որ գնում է եկեղեցի և ականջները կախ լսում այդ անունը: Թե բա Գարեգին Երկրորդ անունով կաթողիկոսի չեմ ճանաչում… Իսկ Ալլահշուքյուր Փաշազադեին ճանաչո՞ւմ ես… Գնա, խնդրիր, ոտքերն ընկիր, որ գա և օրհնի Հայոց խորհրդարանի առաջին նիստը:
Ի դեպ, Փաշինյանն այս խայտառակ հայտարարությունն արել է ՀՀ ԱԺ առաջիկա նիստի հետ կապված, որն, ըստ ավանդույթի, պետք է օրհնվի Հայոց Հայրապետի խոսքով կամ ուղերձով: Երես չունեն Կաթողիկոսին դիմելու և, խնդրեմ, բաներ են հայտարարում, որոնց տակից դուրս գալ հաստատ չեն կարող: Իրավիճակը տրագիկոմեդիայից այնկողմ է արդեն: Չճանաչված Փաշինյանը հայտարարում է, որ չի ճանաչում տիեզերահռչակ Ն.Ս.Օ.Տ.Տ. Ամենայն Հայոց Կաթողիկոս Գարեգին Երկրորդին: Ու չճանաչվածի պետքն էլ չէ, որ իր անմիտ հայտարարությամբ ողջ աշխարհն է խնդացնում վրաներս: Դու, ախր, այնքան չճանաչված ես, որ քեզ չեն էլ շնորհավորում ընտրություններում հաղթելու կապակցությամբ, քեզ հետ խաղաղության պայմանագիր չեն ստորագրում, քո առաջ սահման չեն բացում… Հասկացանք, Թրամփի հեռախոսի համարն ունես: Բայց դա փա՞ստ է, որ Թրամփը ճանաչում է Նիկոլ Փաշինյան անունով վարչապետի: Շատ էլ թե պետքարտուղարի ավագ խորհրդականի կրտսեր օգնականը շնորհավորական ուղերձ է հղել կազմակերպածդ ծռտի ընտրությունների կապակցությամբ: Հետո՞:
Ինչևէ, նորընտիր խորհրդարանի անդրանիկ նիստում բոլոլա է լինելու և մեծ սկանդալ: Նիկոլը կարծես մտադիր է մի կարգալույծ հռչակված տերտերի բերել և Հայր մեր կարդալ տալ ԱԺ նիստերի դահլիճում՝ իբրև օրհնություն նորընտիր խորհրդարանին: Եթե այդպես է, ապա դա դառնալու է այս ընդդիմության առաջին փորձությունը: Ոչ մի պարագայում չի կարելի թույլ տալ, որ նման բան տեղի ունենա: Սուլեք, աղմկեք, ինչ ուզում եք արեք, բայց թույլ մի տվեք, որ այդ օրը նիկոլական մի ֆալշ տերտեր ՀԱԵ-ի անունից ողջույնի խոսք փոխանցի ձեզ և «օրհնի»: Լքեք դահլիճը, եթե տեսնեք, որ ուզում են պարտադրել ձեզ այդ զառանցանքը: Ու կտեսնենք թե ՀԱԵ դեմ արշավի այդ ի՞նչ նոր փուլի սկիզբ է դնում չճանաչված Նիկոլը:
Հ.Գ. ՔՊ առաջնորդը բարեհաճել էր հրապարակել ԱԺ մշտական գործող հանձնաժողովների ՔՊ-ական 12 նախագահացուների անունները: Նմուշի համար մեկ հատիկ ճանաչված մարդ չկա մեջները: Նրանց կարելի է մեկ բառով բնութագրել՝ ուսապարկ: Այդ մարդիկ խորհրդարանում են հայտնվել, որովհետև ուսապարկ են… Հասկանո՞ւմ եք ինչ է սպասվում մեզ վաղը, եթե սրանց մի հատ էլ ֆալշ տերտեր օրհնի… Տրագիկոմեդիան հո պոզով պոչով չի՞ լինում…