Սա նաև այդ պատվերը կատարողների բարոյական անկման մասին է վկայում
Fri, 02 Oct 2026 00:25:46 +0400
Այսօր բոլորը գրում են սահմանը հատած ադրբեջանցու մասին ու արդարացիորեն արձանագրում, որ խաղաղություն կոչվածը միֆ է. ըստ էության` մեր սահմաններն անպաշտպան են, մեր իրավապահները` ոչ կոմպետենտ, իսկ իշխանությունն էլ իրականությունը միտումնավոր թաքցնում է` վտանգների մասին չի ահազանգում, որ գոնե մարդիկ իրենք իրենց գլխի ճարը տեսնեն… Եվ պատկերացնու՞մ եք` ինչ է լինելու, եթե Աստված մի արասցե` Տիգրանաշենը հանձնեն…
Բայց ես այսօր լրիվ ուրիշ բանի մասին եմ գրելու` 2 գործի, որոնք ինձ ցնցել են իրենց աբսուրդայնությամբ: Եվ ես կրկին համոզվեցի, որ այս իշխանության ամենամեծ վնասը դատաքննչական մարմինների այլասերումն է, դրանց ստրկացնելն ու անխնա դաժանությամբ շահագործելը` հանուն սեփական աթոռների:
Մի գործը վերաբերում է հանրահայտ ընտրակաշառքի մեղադրանքներին, «Ուժեղ Հայաստանի» կողմից իբրև թե բաժանված: Էն որ հայտնի անձնավորությունն ասում էր` «մերը 100% օրգանիկ ձայներ են, նրանցը` 100% ընտրակաշառքով ստացված»: Ու մինչ օրս ոչ դատված մարդ կա, ոչ հաստատված փաստ: Մեր Ոսկանը օրերս մի գործի էր անդրադարձել, որտեղ մեղադրյալները երկուսն են` «Ուժեղների» ներկայացուցիչ, Նոյեմբերյանի նախկին փոխքաղաքապետ Մհեր Աղամյանն ու երկու որդիների հայր Գուրգեն Մակյանը: Ուրեմն Մակյանի որդիները, որոնք էվակուատորի վարորդներն են եղել, մեղադրվել են Ղրիմի կամրջի պայթեցման գործով և Ռուսաստանում դատվել: Էս տղաները պնդում են, որ ոչ մի կապ չունեն պայթեցման հետ, անարդար դատվել են և ծանր վիճակում գտնվող հայրը խնդրել է Աղամյանին` մի բանով օգնել, որ որդիներն ազատվեն ռուսական բանտից ու տուն վերադառնան: Աղամյանն այդ օրն առաջին անգամ է տեսել «կաշառատուին», ընդամենը մի խոսակցություն է եղել նրանց միջև: Պարզ է, որ Աղամյանը նման հարց լուծել չէր կարող, բայց մեկ հատիկ խոսակցությունը բավարար է եղել, որ երկուսին էլ բռնել, մեկին տնային, մյուսին` բանտային կալանք են տան, 3 ամիս խոշտանգեն, միայն օրերս են ազատ արձակել, բայց դատը գնում է…
Երկրորդը ձեզ բոլորիդ հայտնի Էդգար Ղազարյանի գործն է, ում մեղադրում են ՍԴ դատավորներին արատավորող տեղեկություններ տարածելու համար: Խոսքը Անկախության հռչակագրի մասին խայտառակ որոշումից հետո էդգարի հնչեցրած գնահատականների մասին է: Ի դեպ, PISA-2025 ի արդյունքներից ինձ համար ամենազարմանալին այն էր, որ 15 տարեկանները փաստը չէին կարողացել տարբերել գնահատականից: Հիմա այլևս չեմ զարմանում, քանզի բարձրագույնավարտ քննիչները նույնպես տեղեկությունը չեն տարբերում գնահատականից:
Ի՞նչ է ասել Էդգար Ղազարյանը ՍԴ դատավորների մասին, որով արատավորել է այդ «սրբագույն» արարածներին: Ընդ որում, ոչ թե դատավորներն են դիմել, այլ նրանց փոխարեն քննիչներն են նեղվել: Մի քանի մեջբերում անեմ մեղադրանքից.
Ասել է` «նման տեսակետ կարող է ունենալ կամ տգետը, կամ գիտակից դավաճանը»: Նրանք «պետական դավաճաններ են, վարձկան ահաբեկիչներ, ապօրինության հետևանքով այնտեղ հանգրվանած կազմակերպված հանցավոր խմբի անդամներ, որոնք ծառայում են թշնամուն»: Դա բացարձակ ապօրինի որոշում է և այդ որոշմամբ դատարանը վերածվել է «քաղաքական բուդկայի»: ՍԴ նախագահը հանդես է եկել որպես «վարձկան ահաբեկիչ, այլ ոչ թե դատավոր», իսկ ՍԴ-ն վերածվել է «ՔՊ-ի իրավական գրասենյակի, որտեղ կայացվում են քաղաքական որոշումներ»:
Եթե սրանք արատավորող տեղեկություններ են, ուրեմն իրոք ՍԴ-ն «վարձկան ահաբեկիչների» որջ է և Էդգար Ղազարյանը հույժ կարևոր բացահայտումներ է արել, իսկ եթե զրպարտություն է և վիրավորանք, ապա պետք է քննվի քաղաքացիաիրավական սկզբունքով` ՍԴ դատավորների հայցերի հիման վրա:
Նման իրավական տգիտություն, իրավական հասկացությունների խեղաթյուրում ու մանիպուլյացիաներ միայն քաղաքական պատվերի առկայության դեպքում է հնարավոր: Եվ սա ոչ միայն պատվեր իջեցնողների, այլ նսև այդ պատվերը կատարողների բարոյական անկման մասին է վկայում: