Իտալիան օգոստոսի 4-ին կայանալիք ԵՄ խորհրդի նիստում քննարկման կդնի մի շարք երկրներում, այդ թվում՝ Հայաստանում, ԵՄ անդամ պետություններից անօրինական միգրանտների համար պահման կենտրոններ ստեղծելու առաջարկը։ Այս մասին գրում է Corriere della Sera թերթը։

Ավելի վաղ ԵՄ 22 երկրներ նամակով դիմել էին դաշինքի ղեկավարությանը` կոչ անելով ամրապնդել ԵՄ արտաքին սահմանները և ուժեղացնել պայքարը ապօրինի միգրացիայի դեմ։

«Իտալիան, ի դեմս ներքին գործերի նախարար Մատեո Պյանտեդոզիի, օգոստոսի 4–ին հրավիրված Եվրոպական խորհրդի նիստում կներկայացնի անօրինական միգրանտների հայրենադարձության համար ալբանական մոդելով նոր կենտրոններ ստեղծելու մասին առաջարկ, որոնք, սակայն, ֆինանսավորվելու են եվրոպական միջոցներով և գրեթե բոլորը գտնվելու են Աֆրիկայում», – գրում է թերթը։
Թերթը նշում է, որ այն երկրների նախնական ցուցակում, որտեղ հնարավոր է նման կենտրոնների բացումը, ներառված են Ռուանդան, Գանան, Սենեգալը, Թունիսը, Լիբիան, Մավրիտանիան, Եգիպտոսը, Ուգանդան, ինչպես նաև Ուզբեկստանը, Հայաստանը, Չեռնոգորիան և Եթովպիան։

Հիշեցնենք, որ հուլիսի 30-ին հազարավոր երիտասարդ մարոկկացիներ հավաքվել էին Մարոկկոյի և իսպանական Սեուտայի (Իսպանիայի էքսկլավ, որը ցամաքից շրջապատված է Մարոկկոյի տարածքով – խմբ.) միջև գտնվող սահմանի մոտ: Իսպանիայի ներքին գործերի նախարարության և տեղի իշխանությունների վերջին տվյալներով՝ մեկ օրում 40 000-60 000 անօրինական միգրանտ է անցել Սեուտա: Իսպանիայի իշխանությունները շտապ ուժեղացրել են սահմանը՝ լրացուցիչ ոստիկանական և ռազմական ուժերով՝ իրավիճակը վերահսկելու համար։