Հանցագործները՝ բանակու՞մ․ Պուտինի ուշագրավ որոշումը
Wed, 05 Aug 2026 14:00:53 +0400
Ռուսաստանի նախագահ Վլադիմիր Պուտինը ստորագրել է օրենք, որը թույլ է տալիս մի շարք ծանր հանցագործությունների համար դատապարտված անձանց պայմանագրեր կնքել Պաշտպանության նախարարության հետ: Փաստաթուղթը, որը հստակեցնում է պայմանագրային զինվորական ծառայության համար իրավասու անձանց ցանկը զորահավաքի, ռազմական դրության կամ պատերազմի ժամանակ, հրապարակվել է պաշտոնական իրավական տեղեկատվության պորտալում։
Օրենքի համաձայն՝ պայմանագրեր կնքելու իրավունք է տրվել ավազակության, հանցավոր կազմակերպությանը մասնակցելու, թմրանյութերի մաքսանենգության, անօրինական միգրացիայի կազմակերպման, կանխիկ դրամական միջոցների մաքսանենգության, միջուկային նյութերի անօրինական շահագործման, միջուկային նյութերի գողության, զենքի, զինամթերքի և ռազմավարական նշանակություն ունեցող ապրանքների մաքսանենգության, պահպանվող օբյեկտներ անօրինական մուտք գործելու, վառելիքի և էներգետիկայի օբյեկտներում անվտանգության պահանջների խախտման և պետական գաղտնիք պարունակող փաստաթղթերի կորստի հետ կապված հանցագործությունների համար դատապարտված անձանց։
Պետդուման համապատասխան օրինագիծը հաստատել է հուլիսի 22-ին՝ երկրորդ և երրորդ ընթերցմամբ: Փաստաթուղթը նախկինում խորհրդարանի ստորին պալատ էր ներկայացվել կառավարության կողմից։
Պաշտպանության փոխնախարար և Ռուսաստանի զինված ուժերի գլխավոր ռազմաքաղաքական վարչության պետ Վիկտոր Գորեմիկինը հայտարարել է, որ հոդվածների ցանկի ընդլայնումը կավելացնի պայմանագրային զինծառայողների թիվը, և որ նոր օրենքով զորակոչված զինծառայողները կծառայեն հատուկ ստորաբաժանումներում՝ մյուս պայմանագրային զինծառայողներից առանձին։