Բաքվում մեծ ակնկալիքներ ունեն հայ-ադրբեջանական առևտրաշրջանառությունից
Sat, 08 Aug 2026 16:00:05 +0400
Ադրբեջանի և Հայաստանի միջև տնտեսական կապերի լիակատար վերականգնումից հետո երկու երկրների միջև փոխադարձ առևտուրը կարող է հասնել տարեկան մոտ 300 միլիոն դոլարի։
Այսպիսի կարծիք է հայտնել Միլլի Մեջլիսի պատգամավոր, տնտեսագետ Վուգար Բայրամովը, հայտնում են ադրբեջանական ԶԼՄ-ները։
Հիշեցնելով, որ այսօր լրանում է Վաշինգտոնյան համաձայնագրի ստորագրման մեկամյակը, նա նշել է՝ ձևավորված տարածաշրջանային կարգը նոր հնարավորություններ է ստեղծում ամբողջ Կովկասի զարգացման համար։
«Սա ակնհայտ է ոչ միայն ԱՄՆ-ի և Ադրբեջանի միջև հարաբերությունների զարգացման, այլև տարածաշրջանում խաղաղության և համագործակցության նոր հիմքի ձևավորման մեջ», – նշել է Բայրամովը։
Նա ընդգծել է, որ Ադրբեջանը շարունակում է հավատարիմ մնալ խաղաղության օրակարգին «և, որպես այս մոտեցման մաս, էներգակիրներ է արտահանում Հայաստան։ Ավելին, վերացվել են Հայաստան ուղարկվող բեռների հետ կապված բոլոր սահմանափակումները»։
Ադրբեջանցի պատգամավորի պնդմամբ, TRIPP-ի շահագործման հանձնումը, հաղորդակցությունների վերականգնումը և տարածաշրջանի երկրների միջև տնտեսական կապերի ընդլայնումը կարևոր պայմաններ են խաղաղության ամրապնդման համար։
Ըստ Բայրամովի, տարբեր հաշվարկները ցույց են տալիս «Ադրբեջանի և Հայաստանի միջև 38 տեսակի ապրանքների ներմուծման և արտահանման գործընթացի իրագործելիությունը։
«Սա նշանակում է, որ տնտեսական կապերի լիակատար վերականգնումից հետո երկու երկրների միջև առևտրաշրջանառությունը կարող է հասնել տարեկան մոտ 300 միլիոն դոլարի։ Սա ներառում է ինչպես Հայաստանից Ադրբեջան արտահանումը, այնպես էլ Ադրբեջանից Հայաստան արտահանումը», – ասել է նա։