Թագուհի Ղազարյանի ընտանիքը «գոյատևում» է ամսական 2 մլն դրամ աշխատավարձով

Sat, 08 Aug 2026 21:15:56 +0400

Երեկ՝ օգոստոսի 7-ին, ԱԺ ամբիոնից ունեցած ելույթի ժամանակ ՔՊ-ական պատգամավոր Թագուհի Ղազարյանը հայտարարեց․ «Մենք փող չունենք, իմ ընտանիքը փող չունի, որ տար Ղարաբաղին, իսկապես իմ աշխատավարձով է ապրում իմ ընտանիքը»։

Մենք ուսումնասիրել ենք Թագուհի Ղազարյանի՝ Կոռուպցիայի կանխարգելման հանձնաժողով ներկայացրած հայտարարագիրը։ Ըստ այդմ Ղազարյանը միայնակ է բնակվում, նա իր ընտանիքի անդամների մասին որևէ տվյալ չի տրամադրել։ Հայտարարագրել է 1 բնակարան, որպես միանձնյա սեփականություն։ Բնակարանը գնել է 2022 թ-ին, գտնվում է Երևանի Նոր Նորք վարչական շրջանում։ Տարեվերջին նրա բանկային հաշիվներին եղել է 8 մլն 476 հազար 957 դրամ գումար։ Ինեկոբանկից 1 մլն 932 հազար 660 դրամ վարկ է վերցրել։ Նրա տարեկան եկամուտները կազմել են 23 մլն 925 հազար 996 դրամ, որից 13 մլն 503 հազար 580 դրամը ստացել է աշխատավարձ՝ Ազգային ժողովից, 8 մլն 151 հազար դրամը՝ «Հայաստանի ամերիկյան համալսարան» հիմնադրամից, իսկ մնացած 2 մլն 271 հազար դրամը՝ եկամտահարկի վերադարձից։

Ստացվում է, որ Ղազարյանի ընտանիքը «գոյատևում» է նրա ստացած ամսական 2 մլն դրամ աշխատավարձով։
Ի դեպ Ղազարյանը նաև հիփոթեքային վարկ ունի, որի մնացորդը կազմում է 23,7 մլն դրամ։ Նախորդ տարի նա 5,5 մլն դրամ էլ ծախսել է բնակարանի վերանորոգման վրա։