Meta-ի հիմնադիր Մարկ Ցուկերբերգը հանդես է եկել մանիֆեստով, որտեղ ներկայացրել է արհեստական բանականության տեխնոլոգիաների զարգացման իր տեսլականը։ Axios-ի փոխանցման համաձայն, գործարարը հայտարարել է, որ վտանգավորն այն է, որ մեկ կազմակերպության կամ կառավարության ձեռքում չափից դուրս մեծ վերահսկողություն հայտնվի ԱԲ տեխնոլոգիաների հետ կապված։ Ցուկերբերգը համոզված է, որ հայտնի բոլոր մտահոգություններն ու մտավախությունները, որոնք արտահայտվել են ԱԲ տեխնոլոգիաների հետ կապված, մեծ հաշվով, մի քիչ չափազանցված են, քանի որ լիարժեք չեն ներկայացնում այն դրական կողմերը, որոնք կարող են մարդկության համար ապահովել ԱԲ տեխնոլոգիաները։ Սակայն, սրանով հանդերձ, Ցուկերբերգն ընդգծել է, որ արհեստական բանականության տեխնոլոգիաները պետք է զարգանան ազատության, բաց եւ հասանելի հետազոտությունների, մրցակցության, հնարավորությունների հանդեպ հավասար հասանելիության սկզբունքների հիման վրա։

Բացի այդ, կարեւոր է, որ Միացյալ Նահանգներն ու դեմոկրատական երկրները շարունակեն մնալ առաջատարն այդ ոլորտում, որպեսզի «մարդկությունը կարողանա վերահսկել «գեր-ինտելեկտը»»։ Meta-ի ղեկավարն իր մենիֆեստում նշել է, որ չափազանց շատ կարգավորումները կարող են դանդաղեցնել ամերիկյան մոդելների զարգացման տեմպը եւ թույլ տալ, որ այլ երկրներ ձեռք բերեն տեխնոլոգիական գերազանցություն։ Նա նաեւ ասել է, որ իր ղեկավարած ընկերությունը մտադիր է ԱԲ լայն սպեկտրի գործիքակազմը դարձնել հասարակության մեծ շրջանակների համար հասանելի եւ կիրառելի։ Միաժամանակ, ասել է, որ Meta-ի ԱԲ գործակալները պետք է տվյալների պաշտպանության ամենաբարձր մակարդակն ունենան, որպեսզի կարողանան լիակատար պրիվատ ռեժիմում աշխատել, եւ նույնիսկ ԱԲ մշակող ընկերությունները նրանց տվյալների նկատմամբ չկարողանան հասանելիություն ունենալ։