Սիմոնյա՞նն է ստում, թե՞ Փաշինյանը․ ինչ է ասել ռուսական TV-ի եթերում
Wed, 26 Aug 2026 14:30:49 +0400
Եթե մոտ ապագայում անցկացվեր հանրաքվե Հայաստանի՝ ԵՄ-ին կամ ԵԱՏՄ-ին անդամակցության վերաբերյալ, Ռուսաստանում շատ կտխրեին հայ բնակչության արձագանքից։
Այս մասին «Դոժդ» հեռուստաալիքի եթերում հայտարարել է Հայաստանի անվտանգության խորհրդի քարտուղար Ալեն Սիմոնյանը։
«Նույնիսկ նրանք, ովքեր չեն քվեարկել մեր կուսակցության օգտին, խորապես վիրավորված են Ռուսաստանի դիրքորոշումից 2020 թվականի պատերազմի և հետագա իրադարձությունների ժամանակ, տարբեր լրագրողների, հասարակական և պետական գործիչների հայտարարություններից, Բելառուսի իշխանությունների հայտարարություններից», – նշել է Սիմոնյանը։
Նա ընդգծել է, որ Հայաստանը կկատարի իր ընտրությունը։
«Մենք մեր ընտրությունը կկատարենք, երբ հարցը դառնա իրատեսական։ Ներկայումս Եվրամիությանը միանալու ուղղությամբ կոնկրետ քայլեր չկան։ Մենք չենք ուզում և չենք պատրաստվում դուրս գալ ԵԱՏՄ-ից», – ընդգծել է Սիմոնյանը։
Նա նաև հայտարարել է, որ Երևանի համար «երկու աթոռի» քաղաքականություն չկա՝ մեկնաբանելով երկրի հարաբերությունները Եվրամիության և Ռուսաստանի հետ։
Հատկանշական է, որ Սիմոնյանի այս հայտարարութունը տրամագծորեն տարբերվում է Նիկոլ Փաշինյանի՝ երկուշաբթի օրը ԱԺ ամբիոնից հնչեցրած այն հայտարարությունից, ըստ որի՝ Երևանը մտադիր է առաջիկայում պաշտոնապես սկսել ԵՄ-ի անդամակցության դիմումի նախապատրաստումը։
Նրա այս խոսքերը ողջունել էին ԵՄ-ում, որտեղ հայտարարել էին, թե այդ գործընթացին ընդառաջ արդեն որոշակի քայլեր կատարվել են։