Լուկաշենկոն խուճապի մե՞ջ է․ երկրի բանակում անակնկալ ստուգումներ են
Wed, 26 Aug 2026 19:30:59 +0400
Բելառուսի նախագահ Ալեքսանդր Լուկաշենկոն հրամայել է անցկացնել երկրի զինված ուժերի մարտական պատրաստության անակնկալ ստուգում՝ ԱՄՆ Կենտրոնական հետախուզական վարչության (ԿՀՎ) տնօրեն Ջոն Ռատկլիֆի Մոսկվա կատարած այցի ֆոնին։
Հանրապետության անվտանգության խորհրդի պետքարտուղար Ալեքսանդր Վոլֆովիչը հայտարարել է, որ ստուգման շրջանակներում բրիգադներից մեկը կլքի իր մշտական տեղակայման վայրը և կկատարի մի շարք առաջադրանքներ։ «Մենք դրանք առայժմ չենք քննարկի։ Ամեն ինչ կախված է զինված ուժերի, գլխավոր շտաբի և զորամասերի ղեկավարության կողմից կայացված որոշումներից», – ասել է Վոլֆովիչը։
Նա նաև նշել է, որ հատուկ ուշադրություն կդարձվի պոտենցիալ հակառակորդի հետ կրակային խոցման մեթոդներին՝ «հաշվի առնելով Ուկրաինայում և Իրանում ռազմական հակամարտությունների փորձը»։
Նրա խոսքով՝ միջոցառման նպատակն է ստուգել կազմավորումների և զորամասերի մարտական պատրաստվածությունը ժամանակակից պայմաններում։
Ավելի վաղ Բելառուսի զինված ուժերի հատուկ գործողությունների ուժերի հրամանատար Ալեքսանդր Իլյուկևիչը հայտարարել էր, որ Մինսկը սկսել է Ուկրաինայի հետ սահմանի մոտ նոր օդադեսանտային գրոհային բրիգադի ձևավորումը։ Զորամասը նախատեսված էր տեղակայել Գոմելի մոտակայքում։