Ներքին ռեպրեսիաներ իրականացնելու ինդուլգենցիա է ստացել ԵՄ-ից
Wed, 26 Aug 2026 21:18:32 +0400
Հակակոռուպցիոն դատարանի շենքի մոտ, որտեղ քննվում է Հայաստանի երկրորդ նախագահ Ռոբերտ Քոչարյանի նկատմամբ կալանավորումը կիրառելու հարցը, «Հայաստան» խմբակցության պատգամավոր Աննա Գրիգորյանն անդրադարձել է ընթացող դատական գործընթացներին և երկրում ստեղծված իրավիճակին։
Նրա խոսքով՝ դատավորները կարող են ձգտել հնարավորինս արագ ավարտել համապատասխան գործընթացները՝ իշխանության քաղաքական ակնկալիքներին համապատասխան։
Գրիգորյանը տեղի ունեցողը որակել է որպես պետական համակարգի թուլացման և քայքայման վտանգավոր դրսևորում։ Նրա համոզմամբ՝ վերջին զարգացումները վկայում են նաև քաղաքական ընդդիմության նկատմամբ ճնշումների խորացման մասին։
Ընդդիմադիր պատգամավորը նաև անդրադարձել է եվրոպական երկրների արձագանքին՝ պնդելով, որ Հայաստանի ներքաղաքական զարգացումների և ընդդիմադիրների նկատմամբ իրականացվող գործողությունների վերաբերյալ եվրոպական կառույցների ու երկրների կողմից բավարար գնահատականներ չեն հնչում։ Նրա կարծիքով՝ իշխանությունները արտաքին գործընկերներից ստացել են բավարար քաղաքական աջակցություն՝ երկրի ներսում կոշտ գործողություններ իրականացնելու համար։
«ԵՄ երկրները դիրքորոշում չեն հայտնում, քանի որ Նիկոլ Փաշինյանը ներքին ռեպրեսիաներ իրականացնելու ինդուլգենցիա է ստացել ԵՄ-ից»,- ասել է նա։